Լեռնային Ղարաբաղի Քաշաթաղի շրջանի բնակիչները մայիսի 17-ին փակել են ԵԱՀԿ Մինսկի խմբի համանախագահների ճանապարհը՝ նրանց դիմավորելով բողոքի ցույցով: Այս մասին հայտնում է Regnum գործակալությունը:
Մինսկի խմբի համանախագահներ Ջեյմս Ուորլիքը (ԱՄՆ), Իգոր Պոպովը (Ռուսաստան) և Ժակ Ֆորը (Ֆրանսիա) դուրս են եկել ավտոմեքենաներից և խոսել ցուցարարների հետ: Նրանց հետ են եղել նաև ԵԱՀԿ ՄԽ ֆրանսիացի ապագա համանախագահ Պյեր Անդրոն և ԼՂՀ արտգործնախարար Կարեն Միրզոյանը:
Ակցիայի ժամանակ ցուցարարներն իրենց վրդովմունքն են հայտնել ԵԱՀԿ ՄԽ համանախագահների՝ վերջերս հրապարակված համատեղ հայտարարությունից: Նրանք նաև վրդովված են ԱՄՆ համանախագահ Ջեյմս Ուորլիքի հայտարարության կապակցությամբ, որում նշված են ԼՂ հիմնախնդրի կարգավորման «6 սկզբունքները»:
«Իմ հայտարարությունն ընդհանուր առմամբ համընկնում է հրադադարի 20-ամյակի կապակցությամբ ընդունված՝ համանախագահների հայտարարության հետ»,- ակցիայի մասնակիցներին ասել է Ուորլիքը: Արցախի բնակիչներին մասնավորապես դուր չի եկել Լեռնային Ղարաբաղի «հարակից տարածքներն Ադրբեջանին վերադարձնելու» համանախագահի հայտարարությունը: Բնակիչների հետ զրույցի ժամանակ համանախագահը, չներկայացնելով մանրամասներ, նշել է, որ «բանակցությունները շարունակվում են»:
Այնուհետև միջնորդները ուղևորվել են դեպի Քաշաթաղի շրջանի վարչակազմ, որտեղ փակ դռների հետևում հանդիպում են անցկացրել Քաշաթաղի ղեկավար Սուրեն Խաչատրյանի հետ: Այսօր՝ մայիսի 18-ին, նրանք կհանդիպեն ԼՂՀ նախագահ Բակո Սահակյանի հետ:
