Կրթության և գիտության նախարար Արմեն Աշոտյանից լրագրողները հետաքրքրվեցին՝ շարունակվելու՞ են արդյոք կուտակային պահումները ուսումնական հաստատություններում: Ի պատասխան՝ Աշոտյանը նշեց. «Այս քննարկումը քանի՞ օր է տևում արդեն, երեք օր է՝ ԱԺ-ում քննարկվում է կուտակայինի նոր փաթեթը, օրենքը կմտնի ուժի մեջ, կլինեն նոր մոտեցումներ, ի՞նչ եք ուզում մեզնից, դուք եք այստեղ ամբողջ օրը, դուք պետք է ասեք: Այսօր օրենքը երկրորդ ընթերցմամբ քվեարկվել է, ուղարկվելու է նախագահի վավերացմանը, ապա մտնելու է ուժի մեջ»: Նա նշեց, որ ԿԳ նախարարությունը գլխադասային չէ և իրականացնում է գլխադասային հանձնաժողովի կողմից ներկայացված, Կառավարության կողմից հաստատված քաղաքականություն:
Լրագրողները նաև հետաքրքրվեցին՝ ինչ կերպ է դասավորվելու ՀՊՃՀ տեղեկատվական և հաղորդակցման տեխնոլոգիաների վարչության մաս կազմող հասարակայնության հետ կապերի և տեղեկատվության բաժնի պետ Վերոնիկա Խորասանյանի «ճակատագիրը» (հիշեցնենք, վերջինիս աշխատանքից հեռացրել էին կուտակային կենսաթոշակի պարտադիր վճարումներ փոխանցելուց ձեռնպահ մնալու դիմումի պատճառով): «Ուզում եք՝ երեսուն հատ ձու առեք՝ մեկ ա, մեջը մազ չկա: Երեկ ճարտարագիտական համալսարանը մեկնաբանել է հայտարարությունն ու ավելացնելու բան չունեմ. ներբուհական խնդիր է, հետո բուհի հայտարարությունը շատ սպառիչ էր, ու ես ուրախ եմ, որ խմբակցությունները անմիջական կապի մեջ են, պատրաստ են ցանկացած նամակ ընթերցել»,- ասաց նա՝ ընդգծելով, որ Վերոնիկան չի ազատվել իր «ըմբոստ» կեցվածքի համար. նրան առաջարկվել է այլ աշխատանք:
Նախարարի խոսքով՝ եթե որևէ մեկը դեմ է կուտակայինին, բայց զուգահեռ ինչ-որ այլ խնդիրներում իրեն փորձում է ոչ ճիշտ դրսևորել, ապա կուտակայինին դեմ լինելն այստեղ կապ չունի: «Եթե մի վարորդ հետիոտնին վրաերթի ենթարկի, բայց մեքենայի վրա փակցված լինի դեմ եմ պիտակը, ապա իրեն չի՞ կարելի պատժել. կարելի է, չէ՞»,- ասաց նա:
Նշենք, որ ՀՊՃՀ-ն, արձագանքելով aravot.am-ի հրապարակմանը, տեղեկացրել է, որ բաժնի աշխատանքի արդյունավետությունը վերջին ժամանակաշրջանում մեծ մասամբ չի բխել բաժնի կանոնադրությամբ սահմանված գործառույթներից ու պահանջներից, որպես ապացույց՝ նշվել է բուհի պաշտոնական կայքի անմխիթար վիճակը, ինչն էլ հենց հիմք է հանդիսացել կառուցվածքային փոփոխություն կատարելու համար:
