Կրթության և գիտության նախարար Արմեն Աշոտյանը անդրադարձել է Սևանի միակ ավագ դպրոցում տեղի ունեցած «սկանդալին». գերմաներենի ուսուցչուհի Անահիտ Կարապետյանը անընդհատ վիճում է դպրոցի տնօրեն Լիանա Մկրտչյանի հետ՝ նշելով, որ դպրոցում բարձիթողի վիճակ է, իսկ դպրոցին «տղամարդ» տնօրեն է պետք: Գերմաներենի ուսուցչուհին անգամ բաց նամակով դիմել էր նախարարին:
Նախարարն ընդգծում է, որ դպրոցը հիմա խոշորացույցի տակ է, խոշորացույցի տակ են պահում նաև լրատվամիջոցները: «Երկու կին վիճել են. սկանդալ ու խայտառակություն դուք եք որակում, մարդ են»,- ասել է նախարարը:
Անահիտ Կարապետյանը բաց նամակում գրել էր. «Դպրոցում ամենաթողության, վախի, տգիտության, սպառնալիքի մթնոլորտ է, տնօրինությունն իրեն առնվազն անհարգալից ու անվայելուչ է պահում ուսուցչական կազմի հանդեպ, խանգարում աշխատանքային պրոցեսին, խոչընդոտում դասավանդման նորագույն մեթոդների ներմուծմանը»:
Արմեն Աշոտյանն ընդգծում է՝ հանձնարարել է ուսումնասիրել և զեկուցել, քանի որ դպրոցի տնօրենն էլ իր հերթին նշում է, որ գերմաներենի ուսուցչուհին դասի ժամանակ էրոտիկ բնույթի ֆիլմեր է ցուցադրել, իսկ աշակերտներն էլ նամակով դիմել են տնօրենին:
«Լրատվամիջոցները իրավիճակը փքում են: Միջանձնային հարաբերությունները թե ուսուցիչների, թե աշակերտների միջև ազդում են կրթության որակի վրա: Խնդիրներ կան բոլոր դպրոցներում, բայց միջանձնային հարաբերություններին խառնվելը ճիշտ չէ: Երկու կին վիճել են»:
12-րդ դասարանի աշակերտները նշել են, որ վիրավորված են դասավանդման մեթոդից: Անահիտ Կարապետյանն էլ արձագանքել է՝ աշակերտները բացակայում են և տնօրենի հրահանգով են այդպես ասում:
