Մոսկվայում այսօր կկայանա Հայաստանի, Ռուսաստանի, Բելառուսի, Ղրղըզստանի և Տաջիկստանի նախագահների հանդիպումը, որը կկրի ոչ պաշտոնական բնույթ: Կողմերը երկկողմ հարաբերությունների զարգացումից բացի՝ կանդրադառնան Ուկրաինայում տիրող իրավիճակին: Ծրագրված են Վլադիմիր Պուտինի երկկողմ բանակցությունները մի քանի պետությունների ղեկավարների հետ՝ հայտնում է RIA Novosti-ն:
Քաղաքական տեղեկատվության կենտրոնի գլխավոր տնօրեն Ալեքսեյ Մուխինը կարծում է, որ Ուկրաինայում շարունակվող հակամարտության պայմաններում հարևան երկրներում անվտանգության հարցերն առաջին պլան են մղվում: Մոսկվայի հանդիպման մասնակից առաջնորդների երկրները մտնում են ՀԱՊԿ կազմի մեջ:
«Խնդիրները, որոնք կանգնած են հետխորհրդային տարածքի որոշ հանրապետությունների առջև, չափազանց ակտուալ են, այսպես կոչված, ուկրաինական նախագծի շուրջ ՆԱՏՕ-ի ակտիվացման ֆոնին: Արդեն դիտարկվում են Ուկրաինայի փլուզման հեռանկարը, դրա որոշ հատվածներում ՆԱՏՕ-ի ռազմաբազաների ստեղծումն ու ամերիկյան ՀՀՊ համակարգերի տեղակայումը, ինչն այժմ ուղիղ, անմիջական սպառնալիք է ՀԱՊԿ պայմանագրի շրջանակներում կապված նախկին ԽՍՀՄ հանրապետությունների ազգային անվտանգությանը»,- ասել է Մուխինն ու չի բացառել, որ անվտանգության այդ հարցերը կքննարկվեն հանդիպման ընթացքում:
Ավելի վաղ ԶԼՄ-ները հայտնել էին, որ ՆԱՏՕ-ի անդամ երկրները դիտարկում են Արևելյան Եվրոպայում զորակազմերի մշտական տեղակայման հնարավորությունը:
Մուխինը ենթադրել է, որ զրույց կարող է ընթանալ ԱՊՀ երկրների տրիբունալի ստեղծման մասին՝ Ռուսաստանի հետ հարաբերությունների սրման շրջանում ուկրաինական և վրացական ղեկավարությունների գործողությունները գնահատելու համար:
Նրա խոսքով՝ այդ ամենից բացի, կքննարկվեն նաև Մաքսային միության շրջանակում առևտրատնտեսական համագործակցությանն առնչվող հարցեր:
