ԱՄՆ նախագահի հանրապետական թեկնածու Միթ Ռոմնին չորեքշաբթի շարունակել է նախընտրական քարոզարշավը՝ խուսափելով մրցակից Բարաք Օբամայի դեմ ուղիղ հարձակումներից:
Ռոմնին նախընտրական միջոցառումները դադարեցրել է երկուշաբթի՝ կապված ԱՄՆ-ի արևելյան ափին պատուհասած «Սենդի» փոթորկի հետ: Քաղաքական գործչի շտաբը նրան անհապաղ ուղարկել էր աղետի հարվածին սպասող Վիրջինիայից խաղաղ Օհայո, որտեղ Ռոմնին, հետևելով դեմկոկրատ մրցակցի օրինակին, հայտարարել էր ընտրապայքարը երեքշաբթի դադարեցնելու մասին: Սակայն հանրապետականը մի քանի հադիպումներ էր ունեցել ընտրողների հետ և հայտարարել, որ չորեքշաբթի կուղևորվի Ֆլորիդա ու կոչ կանի մարդկանց միջոցներ նվիրաբերել փոթորկից տուժածներին օգնելու համար:
Տամպայում ելույթը նրա առաջին խոշոր հրապարակային միջոցառումն էր ընտրություններին նախորդող վերջին շաբաթում:
Բնությունը կարծես թե Օբամային նախընտրական նվեր է մատուցել: Նա ողջ օրը հեռուստաէկրաններին է, վերադարձել է ղեկավարի իր դերին՝ հեռանալով երկրի տնտեսության վերականգնմանն առնչվող տևական քննարկումներից:
Այդ դերում է իրեն փորձել նաև Ռոմնին: Ֆլորիդայի այցի ընթացքում նա խոսել է աղետի հետևանքների վերացման ահրաժեշտության մասին:
Սպիտակ տան մամլո ծառայությունը հաղորդել է, որ Օբաման նախընտրական արշավի կվերադառնա հինգշաբթի: Նախագահը կայցելի Վիսկոնսին, Կոլորադո և Նևադա:
Ողջ չորեքշաբթին Օբաման անցկացրել էր փոթորկից ավերված շրջաններն ուսումնասիրելով, հանդիպել ընտրողների հետ: Որոշ ԶԼՄ-ներ Օբամայի այցը քաղաքական քայլ են համարել, սակայն Սպիտակ տունը հերքել է դա:
Երեքշաբթի և չորեքշաբթի մի շարք հանրապետականներ հայտարարել են, որ Օբաման՝ որպես նախագահ, նման իրավիճակներում իրենց դրսևորում է պրոֆեսիոնալ և ճիշտ:
