Քաղտեխնոլոգ Կարեն Քոչարյանի կարծիքով, սխալ են այն պատկերացումները, թե նոր կառավարության ձևավորմամբ, որոշ նախարարների նշանակմամբ Սերժ Սարգսյանը հանձնվում է: Նրա խոսքերով՝ պարզապես նոր վարչապետն իր կաբինետը ձևավորեց՝ Սերժ Սարգսյանի համաձայնությամբ․ «Նույն իշխանությունն է բերել, ոչ ընդդիմությունն է բերել, ոչ էլ այլընտրանքը, էլ ի՞նչ պարտության մասին է խոսքը»:
Քոչարյանի դիտարկմամբ՝ այս իշխանությունը գոնե վեց տարվա ընթացքում, բացառությամբ սկզբի ժամանակահատվածի, առանձնապես հակված չի եղել փոփոխությունների, հիմա էլ մի հանրապետականին փոխեցին մյուսով:
Մեր զրուցակցի խոսքերով՝ սխալ են նաև այն դիտարկումները, թե նոր կառավարությունում Ռոբերտ Քոչարյանի կադրերն են կամ մարդիկ, ովքեր, իրոք, քիչ թե շատ փոփոխություններ են իրականացրել երկրում․ «Ի՞նչ է նշանակում՝ Քոչարյանի կադրերն են, Սերժ Սարգսյանի օրոք չե՞ն աշխատել: Օրինակ՝ Գագիկ Խաչատրյանը Տիգրանի Սարգսյանի վարչապետության ժամանակ 6 տարի շարունակ ՊԵԿ նախագահ է եղել, Հովիկ Աբրահամյանը հինգ ու կես տարի եղել է ԱԺ նախագահ Սերժ Սարգսյանի իշխանության օրոք, Կարեն Ճշմարիտյանը ՀՀԿ ֆրակցիայի պատգամավոր է եղել, Դավիթ Հարությունյանը՝ պետաիրավական հանձնաժողովի նախագահ»:
Ինչ վերաբերում է ոչ իշխանական ուժերին և այն հանգամանքին, որ նրանք կարծես սահմանափակվեցին վարչապետի փոփոխությամբ, մեր զրուցակիցն ասաց․ «Խնդիրն ի սկզբանե ընդդիմության ձևական լինելն է, երբ ընդդիմությունը վախենում է անգամ իրեն ընդդիմություն կոչելուց՝ էլ ինչի՞ մասին է խոսքը, երբ իրենց ընդդիմություն կամ ոչ իշխանական կոչած ուժերը գնում, ՀՀԿ-ին են ձայն տալիս ԱԺ նախագահի ընտրություններում, հետո էլ խառնվում են իրար, թե՝ «պապայի արև, մամայի արև, հորս արև, մենք չենք տվել», դա արդեն լրիվ այլ հարց է դառնում: Նրանք պետք է անեին գոնե այն, ինչ արեցին քառյակի մյուս ուժերը՝ բոյկոտեցին քվեարկությունը: Հիմա արդեն կարիք էլ չկա արդարանալու:
Տեսնենք, թե ինչ է լինելու կառավարության ներկայացրած ծրագիրը, էլի ազա՞տ են քվեարկելու հօգուտ այդ ծրագրի, թե՞ ոչ»,- եզրափակեց նա:
