Բրիտանական MI-6 հետախուզության նախկին աշխատակից, սովետական հայտնի հետախույզ Կիմ Ֆիլբին չի ափսոսացել, որ աշխատել է ԽՍՀՄ-ի համար: Այս մասին վկայում է առաջին անգամ հրապարակված ձայնագրությունը, ըստ ITAR-TASS-ի՝ հայտնում են բրիտանական ԶԼՄ-ները:
Ֆիլբիի հիշողությունների ձայնագրությունը 1977 թվականին՝ 1963-ին գաղտանզերծումից ԽՍՀՄ փախչելուց 14 տարի հետո, Մոսկվայում արել են Պետական անվտանգության կոմիտեի աշխատակիցները:
1930-ականներին Ֆիլբիի հետ հավաքագրվել են Քեմբրիջի համալսարանի՝ կոմունիստական հայացքների տեր այլ ուսանողներ: «Քեմբրիջյան հնգյակի» մեջ, բացի Ֆիլբիից, եղել են բրիտանական հակահետախուզության և արտգործնախարարության աշխատակից Գայ Բերջեսը, հակահետախուզության աշխատակից Էնթոնի Բլանթը և ԱԳՆ աշխատակից Դոնալդ Մաքլինը:
Խմբի հինգերորդ անդամի անունը ստույգ հայտնի չէ, բայց համարվում է, որ նա եղել է բրիտանական ռադիոտեխնիկական և արտաքին հետախուզությունում աշխատող Ջոն Քերնքրոսը: Պատերազմի տարիներին «Քեմբրիջյան հնգյակը» ԽՍՀՄ-ին հետախուզական տեղեկություններ է փոխանցել նացիստների մասին, որոնք Բրիտանիայի կառավարությունը թաքցրել է Մոսկվայից: Համարվում է, որ «Քեմբրիջյան հնգյակի» հաղորդած տեղեկությունները Կարմիր բանակին օգնել են հաղթել Կուրսկի ճակատամարտում:
Ձայնագրության մեջ Ֆիլբին ասում է. «Ես բացարձակապես չեմ ափսոսում անցյալիս համար, միայն՝ սխալների հետ կապված, որոնք արել եմ աշխատանքի ընթացքում: Եթե հնարավորություն ունենայի՝ նույնը կանեի: Ես լրիվ նույն կերպ կվարվեի»,- ավելացրել է նա: Ֆիլբին ասել է, որ իր ձախ համոզմունքները բացատրվում են նրանով, որ ինքը մանկուց խղճացել է թույլերին ու կարիքավորներին: «Ես արդեն այն ժամանակ խոր զգացմունքային կապ ունեի աղքատների, թույլերի, կարիքավորների, ոչ թե մեծամիտների ու ուժեղների հետ: Իմ ապստամբ բնույթը շատ վաղ տարիքում է դրսևորվել»,- հիշել է նա:
Ֆիլբին հայտարարել է, որ կոմունիստ է դարձել, քանի որ համարել է, որ Լեյբորիստական կուսակցությունը «դավաճանել է» սոցիալիզմի գործին: «Մենք սկսեցինք այլընտրանք փնտրել, և դրանցից մեկը, ակնհայտորեն, կոմունիստական շարժումն էր: Սովետական Միությունն ամբողջ կոմունիտական կուսակցության ուղեղն ու սիրտն էր, եթե նա ընկներ, դա կոմունիզմը մի քանի սերունդ հետ կնետեր»,- ասել է նա:
Ֆիլբին հայտնել է, որ բրիտանական հատուկ ծառայություններում աշխատելու ժամանակ, երբ ինքը աջ հայացքների տեր մարդու է մարմնավորել, իր համար ամենադժվարն այն է եղել, որ նա կապերը խզել է իր կոմունիստ-գաղափարակիցների և Քեմբրիջի ընկերների հետ, որոնք սկսել են նրան կեղծավոր համարել:
