Ավան և Նոր Նորք վարչական շրջանների ընդհանուր իրավասության դատարանում Դավիթ Հարությունյանի նախագահությամբ սկսվեց Արմեն Հայրապետյանի գործի դատական քննությունը:
38-ամյա Արմեն Հայրապետյանը մեղադրվում է այն բանի համար, որ 2013 թվականի հոկտեմբերի 17-ին, գիշերվա ժամը 3-ն անց 30-ի սահմաններում Ջրվեժում գտնվող «Մատրյոշկա» գիշերային ակումբում ալկոհոլ օգտագործած վիճակում կոպիտ կերպով խախտել է հասարակական կարգը, մերկապարուհիների նկատմամբ բռնության գործադրմամբ կատարել է խուլիգանություն:
Հայրապետյանին մեղադրանք է առաջադրված ՀՀ քրեական օրենսգրքի 258 հոդվածի 3-րդ մասի 1-ին կետով:
Դատական նիստի սկզբում ճշտվեց ամբաստանյալի ինքնությունը: Հայրապետյանը միջնակարգ կրթություն ունի, ամուսնացած չէ, չի աշխատում, խնամքին են ծնողները:
1997 թվականին, 22 տարեկանում Արմենը միկրոինսուլտ է տարել, հետևանքները, ըստ իր հայտարարության, զգում է մինչ օրս:
Արմենը 2000 թվականին դատվել է: «Մի քանի հոգի իրենց լավ չեն պահել, մի էրկու բառ ջղայնացել եմ, տուգանք եմ մուծել»,- պարզաբանեց ամբաստանյալը: Այդ դատվածությունը մարված է:
Գործով տուժողները երեք օտարազգի կանայք են, նրանցից մեկը, ասում են, սևամորթ է:
Այսօր տուժողները՝ Օլգա Ֆլորիան, Անժելա Ժիրնովան և Իրինա Կուտյանսկայան, դատարան չէին ներկայացել: Նրանց բնակության վայրի՝ Երևանում վարձակալած բնակարանի հասցեով դատարանի ուղարկած ծանուցագրերը հետ էին վերադարձվել: Երկու ծանուցագրի վրա գրված էր՝ «Տեղափոխվել է», իսկ մեկի վրա չգիտես թե ինչու գրված էր՝ «Չի պահպանվել»:
Ամբաստանյալի շահերի պաշտպան Ա. Բաղդասարյանը հայտնեց, թե տուժողներն ու ամբաստանյալը հաշտվել են, տուժողներն էլ, ըստ իր տեղեկության, ոչ մի տեղ չեն տեղափոխվել, ապրում են նախկին հասցեում:
Նախաքննության ընթացքում մասնակցել են թարգմաններ, քանի որ տուժողներից մեկը ֆրանսերենին է տիրապետում, երկուսը՝ ռուսերենին: Դատարանում այդ նույն թարգմանները հանդես գալ չեն կարող, նրանք լիազորված են եղել միայն նախաքննությանը մասնակցելու համար: Դատարանը որոշեց դիմել դատական դեպարտամենտ, որպեսզի այս գործի քննությանը մասնակցելու համար ուղարկվեն համապատասխան որակավորում ունեցող թարգմաններ:
Մեղադրանքի և պաշտպանական կողմերը միակարծիք էին, որ դատական նիստը տուժողների բացակայությամբ շարունակվել չի կարող:
Մինչև նիստի հետաձգվելը ամբաստանյալի շահերի պաշտպանը դատարանին ներկայացրեց ամբաստանյալի առողջական վիճակին, ծնողներին վերաբերող տեղեկանքներ, ինչպես նաև բնակության վայրից տրված բնութագիր, որտեղ ասված էր. «Արմեն Հայրապետյանը ծնվել է խիստ հայկական և օրինավոր ընտանիքում…Նա շրջապատի կողմից հարգված ու սիրված անձնավորություն է… Օժտված է մարդկային ամենավեհ հատկանիշներով… Գիտի սիրել և սիրվել… Ունի ընկերական շատ մեծ շրջապատ… Իր մարդկային բարձր հատկանիշների շնորհիվ կարողանում է հարթել առաջացած խնդիրները, նրա գործողությոններից տուժողներ չեն եղել… Արմեն Հայրապետյանը նվիրված ընկեր է, ծնողների արժանի զավակ…»:
Այսպիսի բնութագիր ունեցող Արմեն Հայրապետյանին անհարմար էլ էր տեսնել ամբաստանյալի աթոռին կամ պատկերացնել, թե նա կարող էր գիշերային ակումբում, մեկ այլ վայրում մերկապարուհիներին նեղացնել…
Արմեն Հայրապետյանի խափանման միջոցը ստորագրությունն է չհեռանալու մասին:
Հաջորդ դատական նիստը տեղի կունենա մայիսի 12-ին:
