2013 թվականի նախագահական ընտրությունների արդյունքում ընտրված նախագահը պետք է Հայաստանը կարողանա դուրս բերել քաղաքական և սոցիալական ճգնաժամից՝ երկիրը ղեկավարելով ճիշտ ուղղությամբ: «Առաջին լրատվական»-ի հետ զրույցում այս մասին ասաց Հայաստան- Շվեյցարիա խորհրդարանական խմբի գլխավոր քարտուղար Սարգիս Շահինյանը` անդրադառնալով 2013 թվականին կայանալիք ՀՀ նախագահի ընտրություններին:
Ըստ Ս. Շահինյանի՝ նորընտիր նախագահը պետք է կարողանա ժողովրդին վստահություն ներշնչել ՝ ապահովելով երեք կետեր: Շահինյանի խոսքով` նա պետք է կարողանա սոցիալական հավասարակշռություն ստեղծել երկրում: Երկրորդը՝ պետք է կարողանա պահպանել ՀՀ մարտունակության գերազանցությունը Ադրբեջանի նկատմամբ, և երրորդ` արտաքին քաղաքականությունը շատ ավելի ակտիվ լինի:
«Սոցիալական հավասարակշռության առումով, ինչ խոսք, ամեն ինչ պետք է արվի, ժողովրդի, մասնավորապես` երիտասարդության հույսն արթնացնելու համար. երիտասարդությունը պետության, ազգի հզորության հիմքն է: Պետք է արդարադատությունը անկախ լինի, առանց որի ժողովրդի հույսը չի վերականգնվի: Հակառակ դեպքում ամեն ինչ կարելի է համարել կորսված:
Չի կարելի ասել, թե օրենքներ չկան, պարզապես դրանք պետք է կիրառվեն և կիրառվեն առաջին հերթին` ամենավերևների կողմից: Օրինաց երկիրը պետք է ոչ թե վարագույր լինի, այլ իրողություն. յուրաքանչյուր զինվոր, մայր, աշխատող պետք է ներքուստ ունենա այն հստակ համոզմունքը, որ իր քաղաքացիական իրավունքները պաշտպանված են: Պետք է ամեն ինչ անել անպատժելիությունը վերացնելու համար»,- մեկնաբանեց Սարգիս Շահինյանը:
Վերջինս կարևորեց նաև «Մարտի 1»-ի բացահայտումը: Նրա գնահատմամբ՝ գործող իշխանությունը այս ուղղությամբ չկարողացավ հստակ պատասխան տալ:
Հարցին, թե վերոնշյալ փոփոխությունները ո՞ր քաղաքական ուժը կարող է իրագործել՝ պատասխանեց. «Ես չեմ կարող ասել, թե դա ով պետք է անի, որովհետև մինչև այսօր չենք տեսնում, որ նույնիսկ ընդդիմությունը կատարի իր ճիշտ դերը: Մենք խնդրում ենք մեզ ասել, թե ինչպիսի կառուցողական առաջարկներ են եղել խորհրդարանում և դրանից դուրս, որպեսզի որոշ խոչընդոտներ վերանան: Մենք շատ վերացական քննադատություն ենք լսում: Այսինքն՝ շատ դժվար է ասել»:
Եզրափակելով իր խոսքը՝ Սարգիս Շահինյանը հույս հայտնեց, որ ընտրություններում լինի իշխանությանն իսկապես ընդդիմադիր լուրջ ուժ:
