ԱՄՆ իշխանություններն ուրբաթ օրը ձերբակալել են խարդախության մեջ մեղադրվող Փոլ Սելիային, ով հավակնում է սոցիալական Facebook կայքի 50 % բաժնետոմսերին։ Այս մասին տեղեկացնում է Forbes-ը:
Սելիան 2010 թ. հուլիսին հայց էր ներկայացրել Մարկ Ցուկերբերգի դեմ՝ մեղադրելով նրան Facebook-ի բաժնեմասի անօրինական ձեռք բերման և պայմանագիրը խախտելու մեջ, որը իբրև թե 2003 թ. կնքվել էր իր և 18-ամյա Ցուկերբերգի միջև:
Հայցվորը պնդում էր, որ պայմանագրի համաձայն՝ ինքը պետք է ստանար սոցիալական կայքի 50 %-ը՝ գումարած կայքի գործարկման օրը ծրագրվածից հետաձգելու համար 1 %՝ ամեն օրվա համար: Այս պայմանագրի իսկությունը հաստատվելու դեպքում Սելիան հավակնում էր Facebook-ի 84 %-ին: Սակայն 2004 թ. հայցվորը նշել էր միայն պայմանագրի առաջին կետը՝ հավակնելով միայն սոցկայքի կեսին:
Facebook-ի փաստաբաններն իրենց հերթին, դատարան էին ներկայացրել փաստաթղթեր, որոնց համաձայն՝ Սելիայի ներկայացրած պայմանագրի բնօրինակում Facebook բառը չի հիշատակվում, այլ խոսքը միայն StreetFax ծրագրի մասին է, որի ուղղությամբ տարվող աշխատանքները Ցուկերբերգը չի ժխտել:
Հետաքննության ընթացքում պարզվել է, որ Սելիայի կողմից դատարանին ներկայացված պայմանագիրը կեղծված է, նա կեղծել էր փաստաթղթի առաջին էջը: Դա պարզվել է, երբ ուսումնասիրել են Սելիայի համակարգիչը: Բացի դրանից, ուսումնասիրելով Հարվարդի փոստային սերվերները, պարզվել է, որ Ցուկերբերգն իրականում չի ստացել և չի ուղարկել այն բոլոր նամակները, որոնք որպես ապացույց Սելիան ներկայացրել էր դատարանում:
