«Առաջին լրատվական»-ի հետ զրույցում Դամասկոսի թեմի առաջնորդ` Գերաշնորհ Տեր Արմաշ եպիսկոպոս Նալբանդյանը տեղեկացրեց. «Սիրիայում երկրի իշխանության և ընդդիմության միջև ամիսներ շարունակվող ռազմական գործողությունները չեն խաթարել Դամասկոսի հայկական եկեղեցիների և դպրոցների բնականոն աշխատանքը: Հայկական եկեղեցիները գործում են, և փակվելու մասին խոսք անգամ չկա»:
Նա նշեց, որ Դամասկոսի երկու տարբեր թաղամասերում առանձին-առանձին տեղակայված են երկու հայկական եկեղեցիներ, մեկը՝ հայ առաքելական, մյուսը՝ կաթողիկե: Դամասկոսի թեմի առաջնորդի հավաստիացմամբ՝ հայկական այս երկու եկեղեցիներն էլ գործում են և բաց են` ինչպես նախկինում, երբ ավելի խաղաղ էր Սիրիայում:
«Ավելին` այսօր առավոտյան ժ.10-ին պատարագ ենք մատուցել` ինչպես միշտ: Դպրոցները ևս գործում են»,- նկատեց նա:
Հարցին, թե բախումները չե՞ն անդրադարձել հայկական եկեղեցիներ այցելության վրա, պատասխանեց` այս փուլում մի քիչ ավելի քիչ է մարդկանց հոսքը եկեղեցի, բայց այցելություն, այնուամենայնիվ, կա:
Նշենք, որ Սիրիայում շարունակվող ռազմական գործողությունների արդյունքում որոշվել էր ժամանակավորապես դադարեցնել Դամասկոսում ռուսական եկեղեցու աշխատանքը. գործունեությունը կվերսկսվի այն ժամանակ, երբ երկրում իրադրությունը կկայունանա:
Հիշեցնենք. ավելի վաղ Սիրիայի կառավարությունը և ընդդիմադիր Ազգային խորհուրդը համաձայնել էին ՄԱԿ-ի և ԱՊԼ հատուկ բանագնաց Լահդար Բրահիմիի առաջարկին՝ հրադադար պահպանել մուսուլմանական Իդ Ալ-Ադհա տոնի կապակցությամբ: Այսօրվանից հրադադարն ուժի մեջ է:
