Այսօր՝ հոկտեմբեի 25-ին, Քանաքեռ-Զեյթուն վարչական շրջանի բնակիչ Արտակ Նավասարդյանի՝ Կարապետ Ուլնեցու 62 շենքի հարևանությամբ գտնվող և նրա ընտանիքի կողմից 12 տարի շահագործվող հացաբուլկեղենի արտադրամաս են ժամանել վարչական շրջանի պաշտոնյաները` ոստիկանների ուղեկցությամբ:
Նրանք ստիպողաբար ապամոնտաժել են հացաբուլկեղենի արտադրամասի պահեստային հատվածը: Այս մասին տեղեկացնում է shamshyan.com կայքը։
Ինչպես հայտնել է ֆոտոլրագրող Գագիկ Շամշյանը, իրավիճակը ծայրաստիճան լարված է եղել. թաղապետարանի պաշտոնյաների կողմից բռնության կիրառման արդյունքում 2-3 կին վատացել են. անհրաժեշտ է եղել շտապ օգնություն կանչել։
«Մի քանի օր առաջ թաղապետարանից թուղթ ուղարկեցին, որ 5 օրվա ընթացքում քանդենք: Ասացինք, որ դիմել ենք քաղաքապետարան՝ 15 տարվա շինությունը օրինականացնելու համար և խնդրեցինք սպասել պատասխանի: Բայց այսօր, առանց պատասխան նամակի, ոստիկանության 30 աշխատակիցների հետ եկան, հրահրեցին, մայրիկիս տապալեցին գետնին: Այդ ամենը ղեկավարում է Քանաքեռ-Զեյթուն վարչական շրջանի կոմունալ բաժնի պետ Կարեն Բաղոյանը, ով անձամբ լոմը վերցրեց ու սկսեց քանդել տաղավարը: Ու ոչ մի թուղթ ցույց չեն տալիս, ասում են՝ բանավոր կարգադրություն ունենք վերևից»,– ֆոտոլրագրողին պատմել են հացաբուլկեղենի արտադրամասի սեփականատերերը:
Հարևաններն էլ ասել են, որ վարչական շրջանի ղեկավար Գևորգ Ղազարյանն այդ ամենն անում է նրա համար, որ իրենք ԱԺ ընտրությունների ժամանակ չեն սատարել իր ուզած թեկնածուին։
