Ուկրաինայի նախագահ Վիկտոր Յանուկովիչն ու նրա կառավարությունը պետք է երաշխավորեն բոլոր թեկնածուների քաղաքական մասնակցության իրավունքը և ԶԼՄ-ների ազատ հասանելիությունը: Այս մասին ԱՄՆ պետքարտուղար Հիլարի Քլինթոնն ու Արտաքին քաղաքականության և անվտանգության հարցերով ԵՄ գերագույն ներկայացուցիչ Քեթրին Էշթոնը գրել են New York Times-ում հրապարակված իրենց հոդվածում:
«Ներկայում Ուկրաինան կանգնած է վճռորոշ խաչմերուկում: Կենտրոնական և Արևելյան Եվրոպայում նրա շատ հարևանները ցույց են տվել աշխարհին, թե ինչի կարելի է հասնել ժողովրդավարացմամբ և տնտեսական բարգավաճմամբ: Ուկրաինան ունի նույնն անելու հնարավորություն»,- նշել են նրանք:
«Այժմ Ուկրաինայի իշխանությունները պետք է կարևոր քայլեր կատարեն՝ արտահայտելու այդ ներուժը: Դա հատկապես վերաբերում է ժողովրդավարական ինստիտուտների ամրապնդմանը՝ հիմնարար ազատությունների հանդեպ հարգանք ապահովելու նպատակով»:
«Խորհրդարանական ընտրությունները Ուկրաինայում այս ամսվա վերջին կդառնան այդ հաստատությունների համար կարևոր ցուցանիշներ: Մենք անհանգստացած ենք, որ ԿԸՀ-ն շարունակում է նախընտրական դռնփակ հանդիպումներ անցկացնել մի շարք ընտրատարածքներում` որոշ քաղաքական կուսակցությունների ներկայացուցիչների բացակայությամբ»,- ասվում է հոդվածում:
«Ուկրաինայի իշխանությունները պետք է լուծեն ընտրովի հետապնդման կիրառման հարցը, այդ թվում՝ նախկին վարչապետ Յուլյա Տիմոշենկոյի և նախկին այլ պաշտոնյաների գործերը»,- ասել են դիվանագետները:
«ԱՄՆ-ը և ԵՄ-ն իրենց ներդրումն են անում ազատ և արդար ընտրությունների անցկացման հարցում՝ օգնելով կազմակերպել ընտրական հանձնաժողովների անդամների համար դասընթացեր… Սակայն դրանք ոչ թե ընտրություններ են ԵՄ-ում կամ ԱՄՆ-ում, այլ Ուկրաինայում»:
«Մեր ընդհանուր հետաքրքրությունների շրջանակում է ԵՄ-ի հետ ընկերակցող, անկախ, հարուստ և անշրջելի ժողովրդավարական Ուկրաինա տեսնելը: Մենք ձգտում ենք Ուկրաինայի հետ առավել խորը, փոխշահավետ գործընկերության և կշարունակենք աշխատել հանուն այն բանի, որ Ուկրաինան մի օր գիտակցի իր սեփական ներուժը և իր տեղը զբաղեցնի Եվրոպայի ժամանակակից ժողովրդավարությունների շարքում»:
