Պենտագոնի և ԱՄՆ պետդեպարտամենտի ներկայացուցիչները չորեքշաբթի օրը հայտարարել են, որ ԱՄՆ սիրիական ընդդիմությանը շարժական զենիթահրթիռային համակարգեր չի մատակարարում:
Չորեքշաբթի օրը մի շարք ռուսական ԶԼՄ-ներ հաղորդել են, հղում անելով ՌԴ ԶՈՒ գլխավոր շտաբի ղեկավար Նիկոլայ Մակարովին, որ Սիրիայում պատերազմող գրոհայիններն ունեն օտար պետություների, այդ թվում նաև ԱՄՆ արտադրության շարժական զենիթահրթիռային համակարգեր:
«Ես չգիտեմ, թե դա ինչ հաղորդագրություն է: Ես ոչինչ չգիտեմ այն մասին, որ մենք այդ տարածաշրջան նման հրթիռներ ենք ուղարկել»,-ասել է ԱՄՆ ռազմական գերատեսչության ղեկավար Լեոն Պանետան, պատասխանելով լրագրողների`տվյալ լուրերը մեկնաբանելու խնդրանքին:
ԱՄՆ պետդեպարտամենտն էլ իր հերթին հայտարարել է, որ ուզում է տեսնել այդ հայտարարությունների հաստատումները:
«Մենք սիրիական ընդդիմությանը որևէ ռազմական սարքավորում չենք մատակարարում: Եթե ՌԴ-ն ունի սիրիական ընդդիմության ձեռքին նման զինամթերքի ապացույց, ապա մենք կուզենայինք ստանալ այն»,- մամլո ճեպազրույցի ժամանակ նշել է ԱՄՆ պետդեպարտամենտի պաշտոնական ներկայացուցիչ Վիկտորիա Նուլանդը:
