«Կիսաավտորիտար երկրներում իշխանության գլուխ կանգնածները իրենց են ենթարկում տնտեսությունը, քանի որ այդ հզորությունը քաղաքական անկախության հնարավորություն է տալիս` լինի դա Հայաստանում, թե այլ երկրում»,- «Առաջին լրատվական»-ի հետ զրույցում ասաց քաղաքական և ընտրական տեխնոլոգիաների փորձագետ Արմեն Բադալյանը:
Նա անդրադարձավ նախօրեին ՀԱԿ համակարգող Լևոն Զուրաբյանի դիտարկմանը, թե գալիք նախագահական ընտրություններում վերընտրվելու դեպքում Սերժ Սարգսյանն ամեն ինչ անելու է խոշոր տնտեսական և ֆինանսական հնարավորություններ ունեցող Գագիկ Ծառուկյանին և Ռոբերտ Քոչարյանին քաղաքական դաշտից հեռացնելու համար:
Ըստ Ա. Բադալյանի՝ միգուցե Գագիկ Ծառուկյանը հալալ քրտինքով է վաստակել, բայց չգիտի՝ Ռոբերտ Քոչարյանն այդ ե՞րբ հասցրեց բիզնեսով զբաղվել, որպեսզի իր քրտինքով գումար վաստակեր:
«Իհարկե, մամուլում շատ է գրվում, որ նա բավականին մեծ կարողությունների տեր է, բայց դա արդեն Սերժ Սարգսյանի գլխավորությամբ գործող իշխանության խնդիրն է` պարզել, թե մարդ, ով տասը տարվա նախագահ է եղել, ե՞րբ այդքան խոշոր բիզնես ունեցավ: Թող իշխող քաղաքական ուժը այդ մասին մտածի:
Ես խիստ կասկածում եմ, որ խոշոր գործարարները Հայաստանում իրենց հալալ քրտինքով են ինչ-որ բան ունենում: Ինչպե՞ս աղքատ երկրում մեծ հարստությունների տեր դարձան»,- հարց հնչեցրեց քաղաքական և ընտրական տեխնոլոգիաների փորձագետ Արմեն Բադալյանը՝ կարծիք հայտնելով, որ Ծառուկյանն ու Քոչարյանը պաշտպանության կարիք չունեն` հանձին Լևոն Զուրաբյանի:
«Եթե ՀԱԿ-ը պաշտպանող լիներ, կպաշտպաներ Տիգրան Առաքելյանին»,- ասաց նա:
