Դեռևս մեկ ամիս աոաջ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը «Հայկական ժամանակ»-ին հայտնել էր, որ ՀՀ ոստիկանության Երևանի կենտրոնի բաժինն առաջիկայում տեղափոխվելու է ավելի հարմարավետ շենք: «Ոստիկանության կենտրոնի բաժինը չի համապատասխանում արդի պահանջներին: Շուտով բաժինը կլինի ավելի նոր ու ավելի հարմարավետ»,- ասել էր նա:
Երեկ «ՀԺ»-ն այցելեց այդ շենք` պարզելու համար, թե երբ պատրաստ կլինի և երբ կհանձնվի շահագործման: Նշված շենքը գտնվում է Վագգեն Սարգսյանի անվան մարզադաշտի հարևանությամբ, ոստիկանության Կենտրոնի բաժնի քննչական բաժնից ընդամենը մի քանի մետր հեռավորության վրա: Շենքը կիսակառույց էր, իսկ անցորդները նույնիսկ չգիտեին, թե ինչ շենք է դա: Շինարարության պահակներից մեկն ասաց, որ այժմ տեղի են ունենում արտաքին հարդարման աշխատանքները` կարմիր տուֆով պատվում են շենքի արտաքին պատերը (փաստորեն, լավատեսների ակնկալիքները, որ վրացական օրինակով` մեր ոստիկանութան նոր շենքի պատերն էլ ապակուց կլինեն, որպեսզի Վովա Գասպարյանի ասած` «ծեծ, ջարդ, բռնությունը» բացառվի, ի դերև ելան): Դե, շինարարության ավարտի մասին խոսելն էլ դեռ վաղ է:
«Էս շենքը մի 5 տարի առաջ սկսեցին սարքել: Փորեցին, հիմքը դրեցին ու սկսեցին: Բայց հիմա նայում եք՝ շենքը կա, բայց ներսը սաղ դատարկ ա, բան չկա: Հիմա դրսից որ սարքեն, նոր սկսելու են ներսից կարգի բերել»,- ասաց պահակը: Թերթի թղթակցի հարցին՝ իր կարծիքով, ինչքան կտևեն շինարարական աշխատանքները, նա ծիծաղելով ասաց. «Սենց տեմպերով մի 10 տարի հլը կգնա»: Պահակը հայտնեց նաև, որ մոտ 15 օր առաջ ոստիկանության կենտրոնի ապագա բաժնի շինարարական աշխատանքներին ծանոթանալու համար այցելել էր ոստիկանապետ Վովա Գասպարյանը. «Չգիտեմ` ինչի էր եկել: Մի քիչ ֆռռաց ու գնաց»:
«Հժ»-ի այս տարվա հունիսի 28-ի համարում գրվել էր, որ այս շենքում բնակություն էր հաստատել անօթևան 15 մարդ, որոնց այցելած թաղային ոստիկանները պահանջել էին ազատել տարածքը` հակառակ դեպքում «ջարդուխուրդ անելով դուրս կշպրտեն նրանց»: Կառույցի պահակը երեկ ասաց, որ այդ մարդիկ մի քանի ամիս առաջ վտարվել են շենքից, և թե ուր են գնացել` հայտնի չէ: