ԲՀԿ պատգամավոր Նաիրա Զոհրաբյանն այսօր ԱԺ նիստում հայտարարությունների ժամին կրկին ընդգծեց, որ Վարդան Օսկանյանի գործը բացառապես քաղաքական է և խորհուրդ տվեց զերծ մնալ «քծնանքի, ձանձրույթի, ճ–կլասի» ելույթներից, որոնք, ըստ նրա, հենց այսօր հնչում են ԱԺ ամբիոնից:
Ն. Զոհրաբյանն անդրադարձավ գիտական, գեղարվեստական գրականությունը ԱԱՀ-ից ազատելու մասին օրինագծի ԲՀԿ առաջարկին: «Մենք այսօր պետք է համարձակություն ունենանք ընդունելու, որ կարդացող ազգից վերածվել ենք եսիմ ինչի»,- հայտարարեց ԲՀԿ պատգամավորը՝ հավելելով, որ հանրությունը կտա իր գնահատականը նման օրինագիծը մերժողներին:
Ն. Զոհրաբյանը նաև նկատեց, որ կառավարությունը ԲՀԿ առաջարկած օրինագծերը մերժել է նույն ձևակերպմամբ՝ «չի բխում ՀՀ կառավարության տնտեսական քաղաքականության սկզբունքներից»: Զոհրաբյանի բնորոշմամբ՝ կառավարության քաղաքականության սկզբունքն է ահագնացող արտագաղթը, երկրի արտաքին պարտքը, որ օրավուր աճում է և այլն:
ԲՀԿ պատգամավորը հայտարարեց, որ իրենց ներկայացրած օրինագծերը կրկին դնելու են շրջանառության մեջ:
