Իրանական Mehr News լրատվական գործակալության փոխանցմամբ՝ Իրանի խորհրդարանը սկսել է քննարկել այն միջոցների մշակումը, որոնք անհրաժեշտ են օրեր առաջ երկրի գազային հատվածի դեմ ԵՄ-ի սահմանած նոր պատժամիջոցներին հակազդելու համար: Այս մասին հայտարարել է Իրանի խորհրդարանի էներգետիկայի հանձնաժողովի փոխնախագահ Նասեր Սոուդանին:
Վերջինիս խոսքերով՝ այդ միջոցների թվում նշվում են Իրանի դեմ պատժամիջոցներ սահմանած երկրներին հումքի մատակարարման դադարեցումը, այդ երկրներից ապրանքների ներկրման կասեցումը և տվյալ երկրներ իրանցիների զբոսաշրջային այցերի վրա արգելքի կիրառում:
Սոուդանին հավելել է, որ նավթաքիմիական արտադրանքի արտահանման մեծացումը լինելու է պատժամիջոցների հետևանքների մեղմացման ուղղությամբ ձեռնարկվող հերթական քայլերից մեկը: Սոուդանին որպես իրանական գազի հիմնական գնորդներ նշել է Պակիստանին, Լիբանանին, Իրաքին, Սիրիային, Հնդկաստանին, ինչպես նաև Կենտրոնական Ասիայի մի շարք երկրների:
