Ռուսաստանն այսօր ՄԱԿ-ի Անվտանգության խորհրդում խորհրդակցություններ է նախաձեռնել՝ նվիրված Սիրիայում և Լիբիայում տիրող իրավիճակներին: Ինչպես տեղեկացնում է ITAR-TASS-ը՝ հղում անելով ՄԱԿ-ի կենտրոնակայանի աղբյուրին, խորհրդակցությունների ընթացքում ծրագրվում է քննարկել Անվտանգության խորհրդի հայտարարությունների առնչությամբ ՌԴ պատվիրակության կողմից առաջարկված 3 նախագծեր, որոնք վերաբերում են Սիրիայի հանրապետությունում զինադադարի խրախուսմանը, որն առաջարկել է Բրահիմին, հոկտեմբերի 21-ին Դամասկոսում տեղի ունեցած պայթյունին և լիբիական Բանի-Վալիդ քաղաքում տիրող իրավիճակին:
Աղբյուրի փոխանցմամբ՝ ԱԽ հանդիպումը ծրագրված է այսօր՝ Մոսկվայի ժամանակով ժամը 18.00-ին:
Սիրիայի հարցով ՄԱԿ-ի ԱԽ-ի հայտարարությունների վերաբերյալ Ռուսաստանի ներկայացրած երկու նախագծերում դատապարտվում է 13 մարդու կյանք խլած Դամասկոսի ահաբեկչությունը, ինչպես նաև ողջունվում Բրահիմիի կարևոր և ճիշտ ժամանակին արված նախաձեռնությունը: Բրահիմին Սիրիայի կառավարությանն ու ընդդիմությանը կոչ է արել զինադադար կնքել հոկտեմբերի 26-28-ը կայանալիք մուսուլմանական Իդ ալ-Ախդա տոնի առիթով:
Լիբիային առնչվող նախագծում ԱԽ անդամներին առաջարկվում է լուրջ անհանգստություն արտահայտել լիբիական Բանի-Վալիդ քաղաքում տիրող իրադրության առնչությամբ, որն անցած շաբաթվանից զինված ընդհարումների թատերաբեմ է դարձել, և իշխանություններին հայտնել հակամարտության խաղաղ ճանապարհով շուտափույթ կարգավորման անհրաժեշտությունը:
