Երգչուհի Ադելը, որը կատարել է Ջեյմս Բոնդի մասին նոր ֆիլմի գլխավոր երգը, բաց կթողնի ֆիլմի համաշխարհային պրեմիերան: The Sun-ի տեղեկություններով` փոփ-կատարողը որոշել է օրերս ծնված իր առաջնեկի հետ այդ օրը տանը մնալ:
«007. Կոորդինատները՝ Սկայֆոլ» ֆիլմի համաշխարհային պրեմիերան տեղի կունենա հոկտեմբերի 23-ին, Լոնդոնի Արվեստների թագավորական սրահում՝ Albert Hall-ում: Սպասվում է, որ ֆիլմի ցուցադրությանը, ի թիվս բազմաթիվ հյուրերի, ներկա կլինեն նաև թագավորական ընտանիքի անդամները՝ արքայազն Չարլզն ու նրա կինը՝ Քորնուոլի դքսուհի Կամիլան:
Սուպերգործակալի մասին 23-րդ ֆիլմի ռեժիսորն է Սեմ Մենդեսը, գլխավոր դերում հանդես է գալիս Դենիել Քրեյգը:
Աղբյուրը նշում է, որ պրեմիերային Ադելի բացակայությունը կարող է մտահոգել ֆիլմը ստեղծողներին, սակայն նրանք պատրաստվում են ճնշում գործադրել երգչուհու վրա: Բացի այդ, հրատարակությունը ենթադրում է, որ Ադելի բացակայությունը կարող է բացասաբար անդրադառնալ Skyfall երգի վաճառքի վրա: Ներկայում ստեղծագործությունը բրիտանական երաժշտական հիթ-շքերթում զբաղեցնում է 5-րդ տեղը: Երգը պաշտոնապես ներկայացվել է հոկտեմբերի 5-ին:
Ադելի որդին ծնվել է հոկտեմբերի 19-ին: Երեխայի հայրը բարեգործական կազմակերպության ներկայացուցիչ Սայմոն Կոնեկին է: Փոքրիկը աստղի առաջնեկն է: Կոնեկին 5-ամյա դուստր ունի Քլերի Ֆիշերի հետ ամուսնությունից:
