Իրանական Mehr News լրատվական գործակալության փոխանցմամբ՝ Իրանի «Բասիջ» (աշխարհազորային կամավորներ) կազմակերպության ղեկավար, բրիգադի գեներալ Մոհամեդ Ռեզա Նագդին հայտարարել է, որ Իսրայելը պետք է պատրաստ լինի նրան, որ իր երկնքում հայտնվելու են հարյուրավոր անօդաչու թռչող սարքեր (ԱԹՍ).
«Միայն մեկ ԱԹՍ-ի հայտնվելու պատճառով Իսրայելը մեկ շաբաթ գտնվել է կոմայի մեջ և հեռացրել է իր հակաօդային պաշտպանության հրամանատարին: Ի՞նչ է նա անելու այն բանից հետո, երբ նրա օդային տիրույթում կհայտնվեն հարյուրավոր ԱԹՍ-ներ:
Ներկայումս «Բասիջ» կազմակերպությունն անցկացնում է զորավարժություններ, որպեսզի քաղաքացիներն իմանան, որ «Բասիջի» անդամները կարող են դիմակայել ցանկացած արտաքին սպառնալիքի»:
Հիշեցնենք, որ բրիտանական մամուլն օրեր առաջ հայտնեց, թե հոկտեմբերի սկզբին Իրանն Իսրայելի տարածք գործուղած իր ԱԹՍ-ի միջոցով թանկարժեք տեղեկատվություն է ստացել Իսրայելի ռազմական պոտենցիալի մասին:
