Новости-Грузия-ի փոխանցմամբ՝ Վրաստանի արտգործնախարար Գրիգոլ Վաշաձեն հանդիպել է Հարավային Կովկասում և Կենտրոնական Ասիայում ՆԱՏՕ-ի հատուկ ներկայացուցիչ Ջեյմս Ափաթուրայի հետ: Հանդիպումից հետո կազմակերպված համատեղ մամուլի ասուլիսի ժամանակ նա հայտարարել է, որ դեռ հայտնի չէ, թե 2014 թվականից հետո ISAF-ի որ ստորաբաժանումներն են մնալու Աֆղանստանում, և արդյոք դրանց թվում կլինեն վրացի զինծառայողներ.
«ISAF-ի կանոնավոր կոնֆերանսներում դաշնակիցները դիտարկում են, թե ինչպիսի ժամկետներում, ինչ հաջորդականությամբ և որ կառույցով ենք մենք դուրս գալու Աֆղանստանից: Մեր կարգախոսն է «Միասին մտել ենք, միասին դուրս կգանք» (In together, out together):
Հետագայում կորոշվի, թե կոնկրետ որ ստորաբաժանումները կմնան Աֆղանստանում՝ այդ երկրի մարտունակության ուժեղացման և բանակի ու ոստիկանության ուսուցման համար: Վրաստանը՝ անկախ նրանից, թե ինչ կառավարություն կլինի երկրում, մշտապես պատրաստ է խաղալ դաշնակցային դեր»:
Ջեյմս Ափաթուրայն իր հերթին շնորհակալություն է հայտնել Վրաստանին Աֆղանստանում խաղաղապահ գործունեության մեջ ներդրում ունենալու համար. «ՆԱՏՕ-ի անդամ չհանդիսացող երկրների թվում ամենամեծ աջակցությունը դուք եք ցուցաբերել: Մենք պետք է ամեն ինչ անենք, որ 2014 թվականից հետո Աֆղանստանը կարողանա ոտքի կանգնած մնալ և ինքնուրույն ապրել: Դա բխում է բոլորի, այդ թվում՝ նաև Վրաստանի շահերից»: