Նյու Յորքի Հեմփսթեդ քաղաքում մեկնարկել է գործող նախագահ Բարաք Օբամայի և Մասաչուսեթս նահանգի նախկին նահանգապետ Միթ Ռոմնիի հեռուստաբանավեճի երկրորդ փուլը:
Ի տարբերություն առաջին փուլի՝ երկրորդում հաղորդավարից բացի՝ հանդիսատեսը նույնպես իրավունք ունի հարցեր տալու:
ԱՄՆ նախագահի թեկնածուները բանավիճում են Նյու Յորք նահանգի Հեմփսթեդ քաղաքի Հոֆսթրի համալսարանում:
Դենվերում հոկտեմբերի 3-ին կայացած հեռուստաբանավեճի մասին հարցումները ցույց են տալիս, որ Միթ Ռոմնին փաստացի հաղթահարել է այն ռեյտինգային տարածությունը, որը մինչ այդ գոյություն ուներ նրա և Օբամայի միջև: Նախագահի կողմնակիցները և հակառակորդները ենթադրում են, որ Ռոմնիի հետ երկրորդ հանդիպման ժամանակ, երբ թեկնածուները կպատասխանեն ոչ միայն հաղորդավարի, այլև հանդիստեսի հարցերին, նա կփորձի առաջ անցնել:
Անցած հանգստյան օրերին երկու թեկնածուներն էլ զերծ մնացին քարոզչական միջոցառումներից: Միթ Ռոմնին բանավեճին պատրաստվում էր Մասաչուսեթսի իր տանը, իսկ Օբաման կիրակի օրն անցկացրել է Ուիլյամսբուրգ քաղաքում: Նա միայն մի քանի րոպեով է դուրս եկել, որպեսզի ողջունի իր կողմնակիցներին: Օբաման առանց մանրամասնելու ասել է, որ բանավեճի «պատրաստությունները հիանալի են ընթանում»: Լրագրողները ներկա են եղել նախագահի հեռախոսազրույցին, որի ընթացքում նախագահն իր կողմնակիցներից մեկին խոստացել է, որ իր թիմը մնացած երեք շաբաթում վճռականորեն կգործի:
Քինգսմիլ գոլֆ-ակումբում, որտեղ կանգ էր առել Օբաման, կարելի էր նկատել նրա խորհրդատուների, ինչպես նաև սենատոր Ջոն Քերիին, ով բանավեճի փորձերի ժամանակ միշտ տանում է Միթ Ռոմնիի դերը: Անիտա Դաննը՝ Սպիտակ տան հասարկայնության հետ կապերի բաժնի տնօրենը, բանավեճի փորձերի ժամանակ Օբամայի խնդրանքով կատարում է CNN հեռուստաընկերության քաղաքական հաղորդավար Քենդի Քրոուլի դերը:
Հեմփոթենդում կայանալիք բանավեճին թեկնածուները պետք է ցույց տան իրենց անձնական հմայքը, ինչպես նաև հակափաստարկների ժամանակ վճռականություն ցուցաբերեն: Կիրակի օրը նախագահի օգնականները վստահեցրել են, որ անցած բանավեճի ժամանակ նախագահի ցուցաբերած թույլ վարքագիծն այլևս չի կրկնվի: Նա կպատասխանի հանրապետական հակառակորդի այն հայտարարություններին, որոնք իրարամերժ կլինեն կամ իրականությանը չեն համապատասխանի:
Ռոբերտ Գիբբսը՝ Օբամայի նախընտրական գլխավոր խորհրդատուն, CNN-ին տված հարցազրույցում ասել է, որ «առաջին բանավեճից հետո իջնելով բեմից՝ նախագահը հասկացել է, որ իրեն բավականաչափ աշխույժ չի դրսևորել»: Գիբբսը խոստացել է, որ այս անգամ ամերիկացի ընտրողներն իրենց առջև կտեսնեն «մարդու, ով անտարբեր չէ այն ընտրության նկատմամբ, որի առջև կանգնած է իր երկիրը»:
Էդ Գիլլեսպին՝ Միթ Ռոմնիի ավագ խորհրդականը, կասկած է հայտնել այն կապակցությամբ, թե նախագահի բանավեճային ոճի փոփոխությունը նրան կօգնի շահել այն ընտրողների սրտերը, որոնք հիասթափված են Օբամայի վարչակազմի վերջին չորս տարվա գործունեության արդյունքներից. «Նախագահը կարող է փոխել իր ոճը: Նա կարող է փոխել մարտավարությունը, սակայն նա չի կարող փոխել իր ծառայողական ցուցակը և իր ռազմավարությունը: Ահա թե ինչումն է այս ընտրությունների իմաստը»։
Առաջավոր ամերիկյան հրատարակությունները և վերլուծաբանները ենթադրում են, որ երեքշաբթի օրը Օբաման նորից ուշադրություն կհրավիրի Մասաչուսեթսի նախկին նահանգապետի այն հայտարարության վրա, թե ամերիկացիների 47 %-ը կախված է կառավարության օգնությունից և հարկեր չի վճարում, ինչպես նաև Bain Capital անձնական ներդրումային ընկերությունում Ռոմնիի, որպես ղեկավարի, գործունեության վրա:
Այսօր հնարավոր են նաև Միթ Ռոմնիի հարկային հայտարարագրի թեմայի շուրջ քննարկումները: Ուրբաթ օրը Օբամայի նախընտրական շտաբը հրապարակել է մի տեսահոլովակ, որտեղ խոսվում է այն 14 %-ոց դրույքի մասին, որը Ռոմնին կիրառել է իր 2011 թվականի շահույթահարկի համար, որն էլ իր հերթին անարդար է հարյուր միլիոնավոր դոլարների սեփականատիրոջ համար:
Հեռուստաբանավեճի վերջին՝ երրորդ փուլը կանցկացվի հոկտեմբերի 22-ին՝ Ֆլորիդայում:
