Չինաստանի ԱԳՆ պաշտոնական ներկայացուցիչ Հոն Լոն զգուշացրել է ԱՄՆ-ին, որ անթույլատրելի է Վաշինգտոնի միջամտությունը Չինաստանի և Ճապոնիայի միջև ընթացող վեճին՝ կապված Արևելաչինական ծովում վիճելի կղզիների հետ: Ինչպես հաղորդում է RBK-ն, ԱԳՆ հայտարարությունը եղել է ի պատասխան ԱՄՆ քաղաքական շրջանակների բարձրաստիճան ներկայացուցիչների մեկնաբանությունների առ այն, որ ԱՄՆ-ը հասկանում է, թե ինչ դրդապատճառներով է առաջնորդվում Տոկիոն, երբ պահանջում է հարգել իր ինքնիշխանությունը:
Նշենք, որ երեկ Ճապոնիայի արտգործնախարար Կոիչիրո Գեմբան Տոկիոյում բանակցություններ էր անցկացել ԱՄՆ պետքարտուղարի տեղակալ Ուիլյամ Բըրնսի հետ, որի ժամանակ ճապոնական կողմը բացատրել էր իր դիրքորոշումը վիճելի տարածքների հարցում:
Չինաստանի ԱԳն հայտարարության մեջ նշված է, թե Պեկինը զգուշացնում է Վաշինգտոնին՝ չորդեգրել «հատուկ» դիրքորոշում կղզիների պատկանելության հարցում:
