«Իմ սրտի մայրաքաղաք» խորագիրը կրող Էրեբունի-Երևան- 2794 տոնակատարության վերջին նոտան, ավանդույթի համաձայն, դրվեց Հանրապետության հրապարակում: Օրվա գլխավոր միջոցառումը, որն այս անգամ կրեց «Իմ սրտի մայրաքաղաք» խորագիրը, մեկնարկեց ժամը 19:00-ին:
Տոնի կապակցությամբ մայրաքաղաք էին ժամանել Երևանի գործընկեր և քույր քաղաքների, ինչպես նաև հանրապետության մարզերի աննախադեպ թվով պատվիրակություններ, ուստի երեկոյի գեղարվեստական մասը ապահովեցին ինչպես հայաստանյան երգարվեստի երգիչ-երգչուհիներ, պարային խմբեր, այնպես էլ արտերկրից ժամանած հայտնի խմբեր ու ճանաչված երգիչներ:
Համերգը վարում էին հաղորդավարուհի Նազենի Հովհաննիսյանը և երգերի խոսքերի հեղինակ Ավետ Բարսեղյանը:
Իրենց կատարումներով Երևանի և երևանցիների տոնը շնորհավորեցին Ռազմիկ Ամյանը, Անդրեն, Անահիտ Սիմոնյանը, Հայկոն, ռուսական էստրադայի երգչուհի Զառան, «Серебро» խումբը, ռուսական շոու բիզնեսի երգչուհի Վերա Բրեժնևան, Արամեն, Ռադիկ Գաբրիելյանը, Լեյլա Սարիբեկյանը, Թաթա Սիմոնյանը, իսկ Սոֆի Մխեյանը ներկայացրեց իր նոր երգը` «Հայաստանի երգը», նաև հայ աստղերը միասին երգ կատարեցին:
Միջոցառումն ավարտվեց տոնական շքեղ հրավառությամբ` Ինգա և Անուշ Արշակյանների երգի հնչյունների ներքո:
Համերգին ներկա էին ոչ միայն հարյուրավոր երևանցիներ, այլև նախագահ Սերժ Սարգսյանը, առաջին տիկին Ռիտա Սարգսյանը, Ն.Ս.Օ.Տ.Տ. Գարեգին Բ Ամենայն հայոց կաթողիկոսը և մի շարք այլ բարձրաստիճան պաշտոնյաներ:
Հիշեցնենք, որ Էրեբունի-Երևանի 2794-ամյակին նվիրված տոնական բուն միջոցառումները մեկնարկել են «Էրեբունի» արգելոց-թանգարանին հարակից հրապարակում։ ՀՀ նախագահ Սերժ Սարգսյանը, Երևանի քաղաքապետ Տարոն Մարգարյանի ուղեկցությամբ, ԱԺ նախագահ Հովիկ Աբրահամյանի, վարչապետ Տիգրան Սարգսյանի, կառավարության և Երևանի ավագանու անդամների ու հազարավոր երևանցիների և մայրաքաղաքի հյուրերի հետ հետևել է բեմականացված ներկայացմանը:
Թատերական ու պարային խմբերի մասնակցությամբ ներկայացվել է մայրաքաղաքի պատմությունը՝ Էրեբունու հիմնադրման օրվանից մինչև մեր օրերը։ Թատերական բեմականացումն ավարտվել է Էրեբունի-Երևանի օրհներգով։
Օրվա ընթացքում տոնական միջոցառումներ են տեղի ունեցել քաղաքի տարբեր մասերում տեղադրված 26 բեմահարթակներում. տոնական ուրախ մթնոլորտ է թևածել մայրաքաղաքի բոլոր վարչական շրջաններում:
