Պակիստանի իրավապահ մարմինները բացահայտել են 14-ամյա տեղացի իրավապաշտպան Մալալա Յուսուֆզայիի դեմ այս շաբաթ մահափորձ իրականացրած թալիբների ինքնությունը: Այս մասին այսօր հաղորդել է երկրի ներքին գործերի նախարար Ռեհման Մալիկը և նշել, որ հանցագործները հատուցումից չեն խուսափի: Այս մասին հաղորդում է ITAR-TASS-ը:
Մալիկը չի հայտնել` դեր խաղացե՞լ է հարձակվողների մասին տեղեկության համար պակիստանյան իշխանությունների խոստացած 105 հազար դոլարի պարգևավճարը:
Նախարարի խոսքով՝ ներկայում երիտասարդ իրավապաշտպանի կյանքին վտանգ չի սպառնում: Փեշավարի զինվորական հիվանդանոցի մասնագետները վիրահատել են աղջկան, որը բազմաթիվ հրազենային վնասվածքներ է ստացել: Յուսուֆզայիի վիճակը ներկայում կայուն ծանր է, սակայն այլևս կարիք չկա նրան բուժման նպատակով արտասահման ուղարկելու:
Դեպքը տեղի է ունեցել հոկտեմբերի 9-ին` Մինգորա քաղաքում, Սվատ գետի հովտում: Ահաբեկիչները կրակ էին արձակել դպրոցական ավտոբուսի վրա, որում գտնվել են Մալալան և նրա դասընկերները: Ահաբեկչության պատասխանատվությունը ստանձնել է «Թալիբան» շարժումը՝ հայտնելով, որ այդ կերպ վրեժխնդիր են եղել նրա արևմտյան հայացքների և թալիբների վրա «հարձակումների» համար:
Մալալան 11 տարեկանից իր սեփական ինտերնետ բլոգն ունի, որտեղ պատմում է սպանությունների և մահապատիժների մասին, որոնք տեղի են ունենում վերը նշված հովտում: Արդյունքում դեռահասը հայտնվել է թալիբների սև ցուցակում:
