Ադրբեջանի նախագահի աշխատակազմի արտաքին հարաբերությունների բաժնի ղեկավար Նովրուզ Մամեդովը հայտարարել է, որ Սոչիում կայացած նախագահների հանդիպման ընթացքում նկատելի է եղել Հայաստանի աննշան, բայց դրական փոփոխություն. տեղեկացնում է Trend-ը:
«Խոսելով այդ հանդիպման մասին, պետք է նշել, որ այն շատ փոքր չափով, բայց որոշակիորեն տարբերվում է բանակցային գործընթացի նախորդ հանդիպումներից, որոնցում հայկական կողմը մոտ մեկուկես տարի նույն դիրքորոշման է եղել»,- ասել է Մամեդովը:
Նրա խոսքով հանդիպումն անցել է նախատեսվածի համաձայն: «Նախ հանդիպել են Հայաստանի, Ռուսաստանի ու Ադրբեջանի նախագահները, այնուհետև բանակցություններին միացել են արտգործնախարարները: Հանդիպումից հետո նախագահները առանձին-առանձին հանդիպել են Մինսկի խմբի համանախագահներին», ասել է Մամեդովը:
«Կարծում եմ այս ժամանակահատվածում Հայաստանի ղեկավարությունը հասկացել է, որ այսպես շարունակվելու դեպքում իրենց դիրքորոշումը հաջողության չի հանգեցնելու և հավանաբար որոշակիորեն ցանկանում է փոխել իր դիրքորոշումը:
Կարծում եմ, Ռուսաստանի նախագահի նախաձեռնությամբ ու մասնակցությամբ արդեն մեկուկես տարի անցկացվող հանդիպումները դրական քայլ են: Եթե նման հզոր տերության նախագահը մինչ այժմ հաջողության չի հասել կողմերի հետ, սակայն այս հանդիպումը ինչ-որ առումով տարբերվում է նախորդներից»,- հայտարարել է Մամեդովը: