Անկախ պետությունների համագործակցության կազմակերպության վիճակագրական կոմիտեն հրապարակել է անդամ պետություններում հունվար ամսին արձանագրված սպառողական գների աճի ցուցանիշները: Ըստ այդմ պարզ է դառնում, որ Հայաստանն այս ցուցակում ամենացածր հորիզոնականներում է: Տարեկան կտրվածքով, հունվար ամսին գնաճը Հայաստանում կազմել է 10.6%: Ավելի վատ միայն Ղրղզստանում է` 20.6%, և Տաջիկստանում` 11.2% (Ղրղզստանի դեպքում անհրաժեշտ է հաշվի առնել, որ այս երկրում անցած տարի տեղի է ունեցել հեղափոխությունը և բախումներ, որոնք տևել են մի քանի ամիս և ծանր են անդրադարձել տնտեսության վրա): Հայաստանին չի զիջում նաև Բելառուսը` 10.6%: Մեր հարևան Ադրբեջանում այդ ցուցանիշը կազմել է 8.3%, Ղազախստանում 8.1%, Ռուսաստանում 9.6%, Մոլդովայում` 6.7%, Ուկրաինայում` 8.2%:
Հայաստանն այս ցուցակում ամենավատն արդյունքներն է արձանագրել նաև ամսական գնաճի կտրվածքով: Հունվար ամսին դեկտեմբերի համեմատ մեր երկրում գնաճը կազմել է 2.8%: Հայաստանից քիչ ավելի լավ ցուցանիշներ ունեն Ղրղզստանը` 2.7% և Ռուսաստանը` 2.4%: