Վրաստանի նոր կառավարությունում նախարարական պորտֆելների բաժանման նախնական պատկերն արդեն մշակվել է «Վրացական երազանք» կոալիցիայի ներսում 2 օր տևած քննարկումներից հետո:
«Վրացական երազանք» կոալիցիան հաղթանակ է տարել խորհրդարանական ընտրություններում և այժմ այդ երկրի օրենսդիր մարմնում ունենալու է 83 ներկայացուցիչ: Միխեիլ Սաակաշվիլիի կուսակցությունը երկրորդն է ըստ հավաքած ձայների և խորհրդարանում ներկայացված է լինելու 67 պատգամավորով: Վրացական խորհրդարանն, ընդհանուր առմամբ, կազմված է 150 պատգամավորից:
Ավելի վաղ «Վրացական երազանքը» հայտարարել էր, որ բանակցություններ է վարելու երկրի գործող նախագահի և կառավարության հետ: Սաակաշվիլիի կուսակցությունը ևս աշխատանքային խումբ է ստեղծել՝ Իվանիշվիլիի կոալիցիայի հետ նոր կաբինետի շուրջ բանակցություններ վարելու համար:
Ըստ հավաստի աղբյուրների՝ նոր նախարարների անունները հայտարարվելու են երկուշաբթի՝ հոկտեմբերի 8-ին:
Այս պահին նախնական պայմանավորվածությամբ ձեռք բերված ցուցակն ունի հետևյալ տեսքը. պաշտպանության նախարար՝ «Մեր Վրաստանը-ազատ դեմոկրատներ» կուսակցության առաջնորդ Իրակլի Ալասանիա, արդարադատության նախարար՝ «Վրացական երազանքի» կողմից խորհրդարանի պատգամավորի թեկնածու Տեա Ցուլուկիանի, ՆԳ նախարար՝ «Վրացական երազանք»-ից Իրակլի Գարիբաշվիլի, փախստականների գործերով նախարար՝ «Ազգային ֆորում» կուսակցության առաջնորդ Կախա Շարթվա, արտաքին գործերի նախարար՝ կոալիցիայի մամլո-խոսնակ՝ Մայա Փանջիկիձե, Եվրաինտեգրման հարցերով նախարար՝ Ալեքսի Պետրաշվիլի` «Մեր Վրաստանը-ազատ դեմոկրատներ» կուսակցությունից, գյուղատնտեսության և սննդի նախարար՝ Դավիդ Կիվալիձե, առողջապահության նախարար՝ Ամիրան Գամկրելիձե, Ազգային բանկի ղեկավար՝ Cartu Bank–ի տնօրեն Նոդար Ջավախիշվիլի:
Խորհրդարանի նախագահի պաշտոնում ներկայացվելու է Հանրապետական կուսակցության առաջնորդ Դավիդ Ուսուպաշվիլիի թեկնածությունը։
Նախարարներին պետք է հաստատի խորհրդարանը:
