Հայաստանում ԱՄՆ դեսպան Մարի Յովանովիչը ՀԱԿ-ի մարտիմեկյան հանրահավաքի նախորդ օրը ԵՊՀ-ում հանդես եկավ քաղաքացիական հասարակության վերաբերյալ ելույթով և կարևորեց քաղաքացիական հասարակության կայացումը Հայաաստանում և ընդգծեց, որ նման հասարակության առկայության դեպքում է երկրի իշխանությունը համարվում լեգիտիմ: Փիլիսոփայության դոկտոր, ԵՊՀ պրոֆեսոր Լյուդմիլա Հարությունյանի գնահատմամբ Յովանովիչի ելույթը «մեսիջ» է:
«Յովանովիչն ասում է, որ մենք էլ կգումարվենք ընդդիմությանը: Ամերիկան դեմոկրատիայի ջատագովն է, նրանք միշտ ցանկացել են քաղաքացիական հասարակությունը ակտիվացնել: ԱՄՆ-ն արդեն 20 տարի է` կերակրում է Հայաստանը: Ու այսօր պահանջում է Հայաստանից խոստումների կատարում՝ Ղարաբաղի հարցի լուծում և ժողովրդավարության հաստատում և Ռուսաստանից հեռու»,- «Առաջին լրատվականի» հետ զրույցում ասաց Հարությունյանը:
Ըստ Հարությունյանի` Հայաստանի իշխանությունների տված խոստումների դիմաց ամերիկացիները շատ փող են տվել և ամեն տարի ԱՄՆ կոնգրեսը մեր սիրուն աչքերի համար չէ, որ փող է տալիս.
«Դրա համար նրանք իրավունք ունեն նաև պահանջելու, որ Հայաստանն իր խոստումները կատարի, և Մարի Յովանովիչը հենց դա է ասում: Քարերը հավաքելու ժամանակն է եկել. մնում է որոշել, թե ո՞վ և ինչպե՞ս»: