Грузия Online-ի փոխանցմամբ՝ այսօր Թբիլիսիում անցկացվել է Վրաստանի գործող կառավարության և խորհրդարանական ընտրություններում հաղթանակ տարած «Վրացական երազանք» դաշինքի միջև իշխանության փոխանցման շուրջ խորհրդակցությունների առաջին փուլը:
Այդ փոլում կառավարությունը ներկայացրել են Գիգա Բոկերիան, Դավիթ Բաքրաձեն, Գիգի Ուգուլավան ու Պավլե Կուբլաշվիլին, իսկ «Վրացական երազանքը»՝ Իրակլի Ալասանիան, Դավիթ Ուսուպաշվիլին, Սոզար Սուբարին ու Իրակլի Գարիբաշվիլին:
Հանդիպման ավարտից հետո Վրաստանի խորհրդարանի նախագահ Դավիթ Բաքրաձեն հայտարարել է, որ երկու կողմն էլ կառուցողական դիրքորոշում են ցուցաբերում և լավ են հասկանում երկրի ու ժողովրդի առջև ունեցած պատասխանատվությունը. «Երկու կողմն էլ ցուցաբերեցին կառուցողականություն, և մենք գոհ ենք բանակցությունների առաջին փուլից:
Բանակցությունները կշարունակվեն երկուշաբթի: Կողմերը պայմանավորվել են դուրս չգալ օրենքի շրջանակներից: Մենք քննարկել ենք նաև ընդդիմության անցկացրած ակցիաները և պայմանավորվել ենք, որ կողմերից ոչ մեկն էլ դուրս չի գա Սահմանադրության շրջանակներից և չի նպաստի իրավիճակի ապակայունացմանը»:
