ԱՄՆ-ը նախկինի պես Ռուսաստանին կոչ է անում օգտագործել իր ամբողջ ազդեցությունը տարածաշրջանում՝ Սիրիայի նախագահ Բաշար Ալ-Ասադի վրա ճնշում գործադրելու համար: Այս մասին, ինչպես հաղորդում է RIA Novosti-ն, հայտարարել է ԱՄՆ պետքարտուղարության պաշտոնական ներկայացուցիչ Վիկտորյա Նուլանդը:
«ՄԵնք պատրաստվում ենք շարունակել այդ հարցի քննարկումը ռուսների հետ: ԱՄՆ-ը բացարձակապես թափանցիկ է և՛ այդ հարցում, և՛ կապված մեր մտադրությունների հետ (Սիրիայի հակամարտության լուծման շուրջ): Մենք շարունակում ենք կոչ անել Ռուսաստանին ավելին անել՝ Ասադի վարչակարգի վրա իր ազդեցությունն օգտագործելու համար»,- ասել է Նուլանդը չորեքշաբթի տեղի ունեցած ճեպազրույցում:
Նուլանդը նաև նշել է, որ ԱՄՆ պետքարտուղար Հիլարի Քլինթոնը ավելի վաղ Ռուսաստանի արտգործնախարար Սերգեյ Լավրովի հետ քննարկել է Սիրիայի հարցով Ժնևի համաձայնության իրականացման հարցը, և ԱՄՆ-ը պատրաստվում է դա պնդել նաև ապագայում:
«Հուլիսին Ժնևի հանդիպմանը մշակվել է իշխանության փոխանցման նախնական սխեմա, և ռուսները դրան հավանություն են տվել… ՄԵնք պատրաստ ենք առաջ շարժվել դրա հիման վրա, ռուսները արդյունքում արգելափակեցին այդ պայմանները ՄԱԿ-ի ԱԽ-ում»,- ասել է նա:
