Ռուսական Интерфакс լրատվական գործակալության փոխանցմամբ՝ Ռուսաստանն ու Ադրբեջանը Գաբալայի ռադիոտեղորոշիչ կայանի (ՌՏԿ) վարձակալության ժամկետի երկարաձգման շուրջ տարվող բանակցություններում չեն կարողացել մերձեցնել իրենց դիրքորոշումները, և մեծ հավանականություն կա, որ Ռուսաստանը հրաժարվի ադրբեջանական կողմի առաջ քաշած պայմաններով (վարձավճարի տարեկան չափը 7 միլիոն դոլարից հասցվել է մինչև 300 միլիոն դոլարի) ՌՏԿ-ի վարձակալումից:
Այս մասին հայտնել է գործակալության ռազմա-դիվանագիտական աղբյուրը: Վերջինս ընդգծել է, որ Բաքուն իր համար ձեռնտու չի համարել ռուսական կողմի ներկայացրած նոր առաջարկը, որով ենթադրվում էր ֆինանսական նախկին պայմաններով 2-3 տարով երկարաձգել Գաբալայի ՌՏԿ-ի վարձակալության ժամկետը:
Աղբյուրը հավելել է, որ մեծ է հավանականությունը, որ Գաբալայի ՌՏԿ-ի վերաբերյալ ոչ մի համաձայնագիր էլ չկնքվի, և որ Ռուսաստանը վերջնականապես հրաժարվի այդ կայանի վարձակալությունից: Աղբյուրն ընդգծել է, որ այդ դեպքում Արմավիրի ՌՏԿ-ն կսկսի «ծածկել» հարավային հրթիռավտանգ ուղղությունը:
