Իրաքի իշխանությունները խուզարկել են Թեհրան-Դամասկոս չվերթի ինքնաթիռը` ստուգելու համար` այն զենք փոխադրո՞ւմ է Սիրիա, թե՞ ոչ:
«Մենք Իրանից Սիրիա և հակառակ ուղղությամբ զենք տեղափոխելու հետ կապված ոչ մի խախտում չհայտնաբերեցինք, այդ պատճառով ինքնաթիռին թույլ տվեցինք շարունակել թռչել»,- AFP-ը մեջբերել է Իրաքի քաղաքացիական ավիացիայի ղեկավար Նասեր Բանդարի խոսքերը:
Հիշեցնենք, որ սեպտեմբերի 30-ին Իրաքի ԱԳՆ-ն հայտարարել էր, որ Բաղդադը մտադիր է իջեցնել և ուսումնասիրել դեպի Սիրիա Իրանից զենքի մատակարարումներ իրականացնող օդանավերը:
Իրաքի ԱԳՆ ղեկավար Հոշիյար Զեբարին նշել է, որ Իրաքը «չի ցանկանում տարանցիկ կետ լինել սիրիական հակամարտության կողմերի զինման կամ ֆինանսավորման համար»:
Ավելի վաղ հայտնում էին, որ Իրաքը թույլ չի տվել իր օդային սահմանով անցնել ԿԺԴՀ-ի ինքնաթիռին, որը թռչում էր Սիրիա: Իրաքյան հետախուզության ներկայացուցչի խոսքով` ինքնաթիռում կարող էր իշխող վարչակարգի համար նախատեսված զենք լինել:
