Հանրահայտ Maxim տղամարդկանց ամսագրի ֆոտոմոդել, Միսս Maxim-2012 Կարինա Գուրինան, որին շաբաթ օրն առևանգել էին Մոսկվայի «Դոմոդեդովո» օդանավակայանում, հայտնաբերվել է: 21-ամյա գեղեցկուհին լրագրողներին պատմել է, որ Իսպանիայից վերադառնալուց անմիջապես հետո նրան առևանգել է սիրահարված երկրպագուն: Նա տղամարդու դեմ հավակնություններ չունի: ԶԼՄ-ները կասկածում են, որ հանցագործությունը խաղարկվել է՝ մոդելի շուրջ աղմուկ բարձրացնելու և նրա նկատմամբ հետարքրքություն առաջացնելու համար: Այս մասին գրում է Newsru.com-ը:
Այն մասին, որ Կարինային անհայտ անձինք առևանգել են սեպտեմբերի 29-ի առավոտյան, մամուլին հայտնել է նրա քույրը՝ Գալինան, որն ուղեկցում էր նրան՝ լուսանկարչի հետ: Նրա խոսքով՝ Կարինային տարել են արտասահմանյան սև մեքենայով, երբ նա լուսանկարվում էր օդանավակայանի շենքի ելքի մոտ, իսկ ինքը փորձում էր տաքսի գտնել:
Կարինայի հեռախոսը մի քանի ժամ չի պատասխանել: Մոդելի քույրը նրա առևանգման մասին հայտնել է իրավապահ մարմիններին:
«Вечерняя Москва»-ի հետ հարցազրույցում Maxim ամսագրի գլխավոր խմբագիր Ալեքսանդր Մալենկովը ենթադրություն է արել, որ առևանգումը կարող է կապված լինել երիտասարդ տղամարդու հետ, հանուն որի նա մայրաքաղաքից տեղափոխվել է մերձմոսկովյան Պոդոլսկ:
Շուտով հայտնի է դարձել, որ աղջկան գտել են, նրա հետ ամեն ինչ կարգին է: Դա դիտարկվում է որպես PR փորձ, մասնավորապես կասկածի տեղիք են տվել մամուլում հայտնված լուսանկարները, որոնցում իբրևէ թե առևանգում են նրան: Տարօրինակ է այն, որ լուսանկարիչը չի վազել նրան օգնության, այլ շարունակել է հանգիստ նկարել, ի դեպ՝ լուսանկարները բարձր որակի են:
Комсомольская правда-ին հաջողվել է շփվել «առևանգվածի» հետ: Նրա խոսքով՝ օդանավակայանում իր վրա է հարձակվել 38-40 տարեկան տղամարդ, իրեն քարշ տվել դեպի մեքենան, իսկ այդ ժամանակ նա բղավում էր՝ պահանջելով թողնել իրեն:
Անծանոթը հանգստացրել է աղջկան՝ ասելով իր հետ ոչինչ չի պատահի և խոստովանել, որ նրան սպասում էր օդանավակայանում, քանի որ տեղյակ էր իր տեղաշարժից: Այնուհետև տղամարդը նրան տարել է օդանավակայանից ոչ հեռու գտնվող առանձնատուն, «նվիրել մի կույտ ծաղիկներ, մոմերով, գինիով ու երաժշտությամբ ընթրիք կազմակերպել»:
Աղջկան նվիրելով թանկարժեք զարդեր՝ երկրպագուն նրան ուղեկցել է սենյակներից մեկը՝ հագստի: «Ես գիշերել եմ նրա մոտ, սակայն ոչ մի սեռական ոտնձգություն տեղի չի ունեցել»,-վստահեցնում է մոդելը: Կասկածներին նա պատասանել է իր կապտուկները ցույց տալով, որոնք առաջացել են, երբ տղամարդը նրան ստիպողաբար տարել է դեպի մեքենան:
