Թեև այս տարի ոռոգման ջրի սակագինը չէր բարձրացել, սակայն գյուղացիները բողոքում էին, որ ջրի համար շատ ավելի են վճարում: Ոլորտի անկախ փորձագետների խոսքով` պատճառը մշակաբույսերի ոռոգման նորմաների բարձրացումն էր, այսինքն` գյուղացիներին ավելի շատ ջուր են տվել և ավելի մեծ գումար են պահանջել:
Սակայն «Առաջին լրատվական»-ի հետ զրույցում Ջրային պետական կոմիտեի նախագահ Անդրանիկ Անդրեասյանը հայտարարեց, որ այս տարի ո՛չ ջրի սակագինն է փոխվել, ո՛չ էլ ոռոգման չափաբաժինները:
«Անփույթ գյուղացի կա` գիշերը քնում է, ջուրը կապում է, ավելի շատ ջուր է վերցնում: Աշխատող գյուղացի կա` խղճով է ջրում է, կա մարդ` կաթիլային է դրել. տարբեր են: Այսինքն` ամեն մեկն առանձին, անհատական է ջուր օգտագործում: Օրինակ՝ այս տարի գյուղացին իր այգու մեջ խոտ է ցանել, որ անցած տարի չկար, ու անցած տարի ջրում էր միայն ծառերը, այս տարի` նաև խոտը: Այսինքն` մի հեկտարի վրա ավելի շատ ջուր է վերցնում, բայց ցանկանում է անցած տարվա ջրի քանակով վճարել: Գնացել են, ջուրը չափել են, ապացուցել, որ ավելի է ջուր վերցնում»,- ասաց Ա. Անդրեասյանը:
Նա հայտնեց, որ այս տարի, անցած տարվա համեմատ, մոտ 300 մլն դրամ ավելի գումար է գանձվել գյուղացիներից ոռոգման ջրի դիմաց, որովհետև ոռոգման սեզոնը սկսվել է ապրիլից, իսկ անցած տարի սկսվել էր հունիսից:
Ա. Անդրեասյանը նաև հայտարարեց, որ հաջորդ տարի ոռոգման ջրի գնի փոփոխություն չի սպասվում:
