Եթե ԲՀԿ-ն չկարողանա պաշտպանել Օսկանյանին, կուսակցության վարկանիշը կընկնի: Այսօր «Առաջին լրատվական»-ի հետ զրույցում ասաց «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանը՝ անդրադառնալով ԲՀԿ-ական պատգամավոր Վարդան Օսկանյանի շուրջ վերջին զարգացումներին:
Նա նշեց, որ ծավալվող իրադարձությունները երկակի ազդեցություն կարող են ունենալ. կարող է մի որոշ խմբին սա գրավի, իսկ մյուսին՝ վանի: Սոցիոլոգի խոսքով՝ քանի որ Վարդան Օսկանյանն ավանդական ԲՀԿ-ական չէ, հրավիրված է, այս իրադարձությունները չեն կարող կուսակցության վարկանշի վրա մեծ ազդեցություն ունենալ, այլ բան է, որ կուսակցությունը չկարողանա պաշտպանել իր ներկայացուցչին: «Այս դեպքում կարող է վարկանիշն իջնել, քանի որ մարդիկ հավատում են, որ կուսակցությունը բավականին հզոր է, որ կարողանա իր անդամներին արդար կամ անարդար ամբաստանություններից ազատել: Սա կունենա նաև միջազգային արձագանքներ, քանի որ Վարդան Օսկանյանը, որպես ԱԳ նախարար, ճանաչված է միջազգային կառույցներում, ուստի հնարավոր է միջազգային կառույցներից դժգոհություններ լինեն»,- մեկնաբանեց Ահարոն Ադիբեկյանը՝ շարունակելով, որ հասարակությունը պառակտված է իշխանամետ, ընդդիմադիր և միջին ուժերի, ուստի ցանկացած երևույթ միանշանակ արձագանք չի կարող ունենալ: Ըստ Ահարոն Ադիբեկյանի՝ ինչ-որ մեկը կա, որն ուզում է ցույց տալ, որ տիրապետում է իրողությանը և գիտի՝ ով ինչ է, եթե ինչ-որ մեկն ուզում է դառնալ ազգի փրկարար, նա պետք է ունենա ամուր թիկունք:
Խոսելով Խաչիկյանի ձերբակալությունից՝ ասաց, որ այս դեպքում ևս արձագանքները միանշանակ չեն կարող լինել: «Կլինեն մարդիկ, ովքեր կասեն՝ իրենց մարդն է, արդար են եղել ձերբակալել են, մյուսը կասի՝ փորձում են պատժել, նախագահական ընտրություններին արդար են ցանկանում երևալ, երրորդին էլ կթվա՝ անմեղ մարդ է, դժվար միայնակ կերած լինի, այդ խեղճ անմեղին են ձերբակալել: Ինչ-որ մեկը հաշվարկ է արել, որ դա կարող է դրականորեն անդրադառնալ կուսակցության վարկանիշի վրա նախագահական ընտրություններին ընդառաջ»,- նկատեց Ահարոն Ադիբեկյանը:
