Google-ի քարտեզներից Apple-ի հրաժարվելու հիմնական պատճառը երկու ընկերությունների միջև առկա տարաձայնություններն են՝ iPhone-ին ձայնային նավիգացիայի գործառույթ ավելացնելու հարցի շուրջ: Ձայնային նավիգացիան վաղուց արդեն հասանելի է Android բջջային համակարգի օգտատերերին: Այս մասին հայտնում է All Things Digital-ը՝ հղում անելով իրավիճակին ծանոթ աղբյուրին:
Բանն այն է, որ Google-ը ձայնային նավիգատորը համարում է իր պլատֆորմի մրցակցային առավելություններից մեկը:
Հակասությունները չլուծվեցին, այդ իսկ պատճառով Apple-ը հրաժարվեց Google-ի քարտեզներից, չնայած այն բանին, որ ընկերությունների միջև լիցենզիոն համաձայնագիրը լրանում է մեկ տարի հետո:
iPhone-ի և iPad-ի համար նախատեսված iOS 6 օպերացիոն համակարգի վերջին տարբերակում Apple-ը սկսել է կիրառել սեփական քարտեզները, որոնք արդեն հասցրել են հայտնվել քննադատությունների տարափի տակ: Օգտատերերը նրանում սխալներ են հայտնաբերել:
