Վրացական «Ախալի Թաոբա» թերթի փոխանցմամբ՝ Վրաստանի պատիժների իրագործման ու իրավական օգնության նորանշանակ նախարար, նախկին օմբուդսմեն Գիորգի Տուգուշին լրագրողների հետ զրույցում անդրադարձել է վրացական բանտերի խնդիրներին.
«Վրաստանի քրեակատարողական համակարգին հատկացված 300 միլիոն լարի գումարը բավական չէ: Մի քանի տարով հատկացված այդ գումարը բավական չէ համակարգի զարգացման համար: Ես այդ մասին բարձրաձայնել եմ դեռևս օմբուդսմեն եղած ժամանակ: Ես չեմ բացառում, որ հատկացված միջոցների հարցով հետաքրքրություն ցուցաբերի աուդիտի ծառայությունը»:
Հիշեցնենք, որ Վրաստանի նախագահ Միխեիլ Սաակաշվիլին օրեր առաջ Վրաստանի պատիժների իրագործման ու իրավական օգնության նախարարի պաշտոնում Գիորգի Տուգուշիին նշանակելիս հայտարարել էր, որ օմբուդսմեն եղած ժամանակ Տուգուշին ամենաշատն է քննադատել Վրաստանի քրեակատարողական համակարգը, ինչի համար էլ իրենց ընտրությունը կանգ է առել հենց Տուգուշիի վրա:
Տուգուշին իր հերթին խոստովանել է, որ իր համար անսպասելի է եղել այդ պաշտոնում նշանակվելը՝ ընդգծելով, որ արդեն հնարավորություն ունի շտկել քրեակատարողական համակարգում առկա թերությունները, որոնց մասին բազմիցս բարձրաձայնել է:
