Ստամբուլի` անչափահասների գործերով դատարանում փետրվարի 28-ին տեղի է ունեցել Հրանտ Դինքի սպանության մեջ մեղադրվող Օգյուն Սամասթի գործով դատական առաջին նիստը, տեղեկացնում է Ազատություն ռադիոկայանը:
Նիստին ներկա չեն եղել Հրանտ Դինքի հարազատները` կինը, երեխաները, եղբայրները: Նրանք մտադիր են բոյկոտել նաև հետագա նիստերը: Նրանք բողոքում են Բեշիքթաշի գերագույն դատարանի` գործը անչափահասների դատարանին փոխանցելու դեմ: Այդ որոշումը գերագույն դատարանը հիմնավորել է նրանով, որ Սամասթը հանցագործությունը կատարելու պահին եղել է անչափահաս:
«Ակոս» թերթի հայկական բաժնի խմբագիր Բագրատ Էստուկյանը տեղեկացրել է, որ անչափահասների գործերով դատավորը հենց սկզբից կանխակալ վերաբերմունք է դրսևորել Սամասթի նկատմամբ` նրան դիմելով «հանցանքի մղված անչափահաս» դիմելաձևով:
Էստուկյանը նաև տեղեկացրել է, որ սպանության գործով նոր հանգամանքներ են պարզվել` Էրգենեկոնի գործով դատավարության ժամանակ: Վկաներից մեկը հայտարարել է, որ Սամասթի հետ սպանության օրը ևս երկու հոգի են եղել:
«Հայր ու աղջիկ նկատել են որ Սամասթի հետ 2 հոգի կան, իսկ աղջիկը նույնիսկ տեղյակ է նրանց խոսակցությանը, սակայն դատարանում այս փաստի վրա բավարար ուշադրություն չի դարձվել»,- ասել է Էստուկյանը:
«Այն, ինչ այժմ բացահայտ է, արդեն 4 տարի առաջ էլ նույն չափով հայտնի էր, այսինքն` կրակողը հայտնի է, կրակողն իր հանցանքը չի ուրացել, այդ կրակողին զենք ապահովողը, Հրանտին սպանել խրախուսողը, թելադրողը` նա էլ է բռնված, նրանց կողքին կա երրորդը, և երեք հոգով այս գործը պիտի աշխատեն փակել», – շեշտեց Բագրատ Էստուկյանը` ամփոփելով. – «Փաստաբանները համոզված են, որ նրանց գործը դյուրացնող ահագին համակարգ կա. սա պետական պաշտոնյաներից բաղկացած համակարգ է, զինվորներից կամ սպաներից բաղկացած համակարգ է, և մինչև այդ մութ ծալքերը չհայտնաբերվեն, արդարություն չի հաստատվի»:
