Մանկության ընկերները մեզ ավելի լավ են ճանաչում, քան մենք ինքներս: Ոչ ոք չի կարող ավելի ճշգրիտ կանխատեսել՝ ինչպես կդասավորվի մեր ճակատագիրը, քան դպրոցական ընկերները,- կարծում են կանադացի գիտնականները:
Մոնրալի Կոնկորդիայի համալսարանի հոգեբանության ֆակուլտետի դասախոս Լիզա Սերբինը և ասպիրանտ Ալեքսա Մարտին-Սթորը վերջապես հրապարակել են դեռևս 1976 թվականից սկսված ուսումնասիրության արդյունքերը: 35 տարիների ընթացքում գիտնականները հետևել են երկու սերնդի երեխաների հասունացմանն ու զարգացմանը,- գրում է newsru.com-ը:
Հետազոտությունները ցույց են տվել, որ հասակակիցների տված գնահատականները շատ ավելի հստակ են սահմանում՝ ինչ գծեր կդրսևորի փորձարկվողը հետագայում: «Եվ դա բնական է, քանի որ երեխաներն իրենց հասակակիցների հետ շփվում են ողջ օրվա ընթացքում»,- նշել է հետազոտությունն իրականացրած գիտնականը:
Ընդհանուր առմամբ, կանխատեսելու համար՝ ո՞վ կդառնա մարդը հասուն կյանքում, արժե հենվել հասակակիցների, ոչ թե հենց այդ մարդու կարծիքի վրա:
