Երեկ մեկնարկեց Հայաստանի ԱԳ նախարար Էդվարդ Նալբանդյանի պաշտոնական այցելությունը Ավստրիա:
Էդվարդ Նալբանդյանին Վիեննայի իր նստավայրում ընդունեց Ավստրիական Հանրապետության նախագահ Հայնց Ֆիշերը:
Ողջունելով Էդվարդ Նալբանդյանին՝ նախագահ Ֆիշերը նշեց, որ Ավստրիան շահագրգռված է բարեկամական Հայաստանի հետ հարաբերությունների առավել խորացմամբ և ամրապնդմամբ:
Շնորհակալություն հայտնելով ընդունելության համար՝ Հայաստանի արտգործնախարարը Ավստրիայի նախագահին հանձնեց ՀՀ նախագահ Սերժ Սարգսյանի ուղերձը և Երևան այցելելու հրավերը: Նախագահ Ֆիշերը խնդրեց իր ողջույներն ու բարեմաղթանքները հայտնել ՀՀ նախագահին և շնորհակալությամբ ընդունելով հրավերը՝ ասաց, որ սիրով կայցելի Հայաստան:
Էդվարդ Նալբանդյանն ընդգծեց, որ վերջին շրջանում երկու երկրների միջև հաստատված բարձր մակարդակի կանոնավոր քաղաքական երկխոսությունը, փոխգործակցությունը ԵՄ ծրագրերի և միջազգային կազմակերպությունների շրջանակներում, զարգացող տնտեսական կապերը, մշակութային փոխանակումների ակտիվացումը արդեն կարևոր ձեռքբերում են, որի վրա հիմնվելով հարկավոր է գործուն քայլեր ձեռնարկել տարբեր բնագավառներում համագործակցությունը առավել ամրապնդելու և ընդլայնելու համար:
Զրուցակիցները մտքեր փոխանակեցին միջազգային հարաբերությունների օրակարգային մի շարք խնդիրների շուրջ:
Վիեննայում Էդվարդ Նալբանդյանի հաջորդ հանդիպումը Ավստրիայի եվրոպական և միջազգային հարցերի նախարար Միխայել Շպինդելեգերի հետ էր:
Հանդիպումը մեկնարկեց առանձնազրույցով, ապա բանակցությունները շարունակվեցին աշխատանքային ճաշի ձևաչափով:
Ողջունելով Հայաստանի արտգործնախարարին՝ Ավստրիայի արտաքին քաղաքական գերատեսչության ղեկավարը գոհունակություն հայտնեց հաստատված բարձր մակարդակի հարաբերությունների կապակցությամբ՝ ընդգծելով, որ ինքը ջերմությամբ է հիշում անցյալ տարի Երևան կատարած այցը, և Հայաստանի իր գործընկերոջ այցելությունը լավ հնարավորություն է Երևանում մեկնարկած երկխոսությունը շարունակելու համար: Նախարար Շպինդելեգերն ընդգծեց, որ հայ-ավստրիական հարաբերություններում հիրավի նոր էջ է բացվել, և Ավստրիան պատրաստակամ է գործուն քայլեր ձեռնարկելու տարբեր ոլորտներում բարեկամ Հայաստանի հետ համագործակցությունն ամրապնդելու և խորացնելու համար:
Շնորհակալություն հայտնելով իր ավստրիացի գործընկերոջը Վիեննա այցելելու հրավերի համար՝ նախարար Նալբանդյանը նշեց, որ հայ-ավստրիական հարաբերություններն ունեն դարերի պատմություն, որը հիշարժան է բարի ավանդույթներով և փոխադարձ բարեկամության դրսևորումներով, և իր այցելության հիմնական նպատակն է նոր լիցք հաղորդել երկկողմ հարաբերություններին, որոնք ունեն չօգտագործված մեծ ներուժ:
Հայաստանի և Ավստրիայի հարաբերությունները խթանելու նպատակով նախարարները պայմանավորվածություն ձեռք բերեցին քայլեր ձեռնարկել իրավապայմանագրային դաշտի ընդլայնման համար:
Հայաստանի և Ավստրիայի արտաքին քաղաքական գերատեսչությունների ղեկավարները շեշտեցին երկկողմ հարաբերությունների խթանման նպատակով բարձրաստիճան փոխայցելությունների կազմակերպման կարևորությունը:
Նախարարներ Նալբանդյանն ու Շպինդելեգերը բովանդակալից զրույց ունեցան տարբեր բնագավառներում երկկողմ համագործակցության ընդլայնման ուղիների, եվրոպական կառույցների և միջազգային կազմակերպությունների շրջանակներում փոխգործակցության սերտացման վերաբերյալ, մտքեր փոխանակեցին միջազգային օրակարգի և տարածաշրջանային խնդիրների շուրջ:
Բանակցությունների ընթացքում քննարկվեցին նաև Հայաստան – Եվրոպական Միություն համագործակցության տարբեր ուղղությունները, Եվրոպական հարևանության քաղաքականության և Արևելյան գործընկերության ծրագրի շրջանակներում երկկողմ փոխգործակցության խթանման նպատակով ձեռնարկվելիք քայլերը:
Ավստրիական կողմի խնդրանքով նախարար Նալբանդյանը ներկայացրեց արցախյան հիմնախնդրի կարգավորման գործընթացի վերջին զարգացումները և ակնկալիքները: Նախարար Շպինդելեգերը վերահաստատեց իր երկրի աջակցությունը Մինսկի խմբի շրջանակներում ընթացող բանակցություններին և հիմնախնդրի՝ բացառապես խաղաղ միջոցներով կարգավորմանը:
Հանդիպմանը մանրամասն քննարկվեց մշակութային և կրթական ոլորտներում համագործակցությունը և դրանց խորացման ուղղությունները: Գոհունակությամբ նշվեց, Երևանի Վ. Բրյուսովի անվան լեզվաբանական համալսարանում ավստրիական գրադարանի բացման փաստը, և մտքեր փոխանակվեցին հումանիտար ոլորտում այլ ծրագրերի իրականացման ընթացքի շուրջ, Վիեննայի դիվանագիտական ակադեմիայի և ՀՀ ԱԳՆ դիվանագիտական դպրոցի միջև համագործակցության վերաբերյալ:
Նույն օրը Հայաստանի արտաքին քաղաքական գերատեսչության ղեկավարն այցելեց Ավստրիայի խորհրդարան, ուր հանդիպեց խորհրդարանի երկրորդ նախագահ պարոն Ֆրից Նոյգեբաուերի հետ:
Հանդիպմանը քննարկվեցին հայ-ավստրիական փոխգործակցության զարգացման, երկու երկրների խորհրդարանների միջև կապերի խորացմանը վերաբերող, միջազգային կազմակերպությունների խորհրդարանական վեհաժողովների շրջանակներում Հայաստանի և Ավստրիայի պատվիրակությունների համագործակցության հարցեր: Անդրադարձ կատարվեց նաև Հարավային Կովկասի տարածաշրջանային խնդիրներին:
Ֆրից Նոյգեբաուերի խնդրանքով Էդվարդ Նալբանդյանը ներկայացրեց Հայաստան – Եվրոպական Միություն համագործակցության հիմնական ուղղությունները, Հայաստանում իրականացվող բարեփոխումները:
Էդվարդ Նալբանդյանը նաև ներկա գտնվեց խորհրդարանի լիագումար նիստին, որտեղ պատգամավորները ծափահարությամբ ողջունեցին Հայաստանի արտգործնախարարի ներկայությունը նիստերի դահլիճում:
Առավոտյան Էդվարդ Նալբանդյանն ծաղկեպսակ դրեց և հարգանքի տուրք մատուցեց ավստրիացի ականավոր գրող, «Մուսա լեռան քառասուն օրը» գրքի հեղինակ Ֆրանց Վերֆելի շիրիմին:
Վիեննայում Էդվարդ Նալբանդյանն այցելեց նաև Վիեննայի Մխիթարյան միաբանություն, որն այս տարի նշում է իր 200-ամյակը: Նախարար Նալբանդյանը շրջայց կատարեց և ծանոթացավ եկեղեցում, թանգարանում և գրադարանում ընթացող վերանորոգման աշխատանքներին, հանդիպում ունեցավ միաբանության անդամների հետ:
Այցի մեկնարկի օրը ավստրիական հեղինակավոր Der Standard օրաթերը ծավալուն հարցազրույց հրապարակեց Էդվարդ Նալբանդյանի հետ:
