Փետրվարի 27-ին Մոսկվայի Ս. Հարություն եկեղեցու բակում տեղադրված Նահատակաց խաչաքարի մոտ, Նոր Նախիջևանի և Ռուսաստանի Հայոց թեմի առաջնորդ Տ. Եզրաս եպիսկոպոս Ներսիսյանի գլխավորությամբ, տեղի ունեցավ հոգեհանգստյան կարգ` 1988 թվականի փետրվարի 27-29-ը Սումգայիթում ադրբեջանցիների կողմից վայրագորեն սպանված երեսունից ավելի հայերի հիշատակը ոգեկոչելու համար:
Արարողությանը ներկա էին Ռուսաստանում Հայաստանի արտակարգ և լիազոր դեսպան Օլեգ Եսայանը, Լեռնային Ղարաբաղի Հանրապետության վարչապետ Արայիկ Հարությունյանը, Մոսկվայի հայ դաշնակցական կազմակերպությունը, Ռուսաստանի հայ կանանց միությունը, տարբեր համալսարաններում սովորող ուսանողներ, Սումգայիթ քաղաքի նախկին բնակիչներ:
«Այսօր եկել ենք՝ ցույց տալու մեր հավատարմությունն ու նվիրումն այն արժեքներին, որոնց համար ապրել են մեր նախնիները: Մեծ են եղել մեր ազգի կորուստները: Ապրեցինք Եղեռն և շարունակությունը եղավ Սումգայիթը: Այսօր ժամանակն է ոչ թե սգալու, այլ արժանապատիվ ապրելով, որպես ճշմարիտ քրիստոնյաներ, մեր արդար իրավունքի պահանջատերը լինելու: Այսօր առավել, քան երբևէ մեզ անհրաժեշտ է համերաշխություն ու միաբանություն: Թող Աստված զորացնի մեզ սիրո մեջ, որպեսզի կարողանանք լինել միաբան և հավերժացնել Սումգայիթի անմեղ զոհերի հիշատակը»,- ասաց սրբազան հայրը:
Ռուսաստանում Հայաստանի արտակարգ և լիազոր դեսպան Օլեգ Եսայանի խոսքերով, Սումգայիթի դեպքերը չկոտրեցին հայի կամքն ու վճռականությունը, այլ ավելի ամրապնդեցին: Դեսպանի կարծիքով, երբ խաղաղ ճանապարհով լուծվի Արցախի հիմնախնդիրը, կպատժվեն նաև Սումգայիթի ոճրագործները:
Նոր Նախիջևանի և Ռուսաստանի Հայոց թեմի
մամլո դիվան