Ասիական զարգացման բանկի մասնակցությամբ սեպտեմբերի 9-20-ը Թուրքմենստանի կողմից անցկացված TAPI (Թուրքմենստան-Աֆղանստան-Պակիստան-Հնդկաստան) գազատարի շինարարության իրականացման նախագծի համաշխարհային հրապարակային ներկայացումը առաջացրել է աշխարհի առաջատար նավթագազային ընկերությունների հետաքրքրությունը: Այս մասին հաղորդում է Trend.az-ը` հղում անելով Թուրքմենստանի կառավարությանը:
Թուրքմենստանի, Աֆղանստանի, Պակիստանի և Հնդկաստանի տնտեսության և նավթագազային գերատեսչությունների ղեկավարներից և մասնագետներից, Ասիական զարգացման բանկի ներկայացուցիչներից կազմված փորձագիտական խմբի հետ գործարար կապերում ամերիկյան Chevron, Exxon Mobil, բրիտանական BP, BG Group, գերմանական RWE, մալայզիական Petronas և այլ ընկերությունների ղեկավարները ծանոթացել են TAPI նախագծի իրականացման հիմնական պայմաններին և դրանում մասնակցության մտադրություն հայտնել:
Նշվում է նաև, որ բացի առաջատար նավթագազային ընկերություններից՝ նախագծում մասնակցության հանդեպ հետաքրքրություն են դրսևորել բազմաթիվ արտասահմանյան բանկային և ֆինանսական ինստիտուտներ:
Բիզնես-շրջագայությունն անցկացվել է Սինգապուրում, Նյու Յորքում և Լոնդոնում, որոնք Հարավարևելյան Ասիայի, Ամերիկայի և Եվրոպայի խոշորագույն գործարար և ֆինանսական կենտրոններն են: Ներկայացվել են Ասիական զարգացման բանակի հետ համատեղ պատրաստված զեկույցը Թուրքմենստանի, «Թուրքմենգազ» պետական կոնցեռնի էներգետիկ ներուժի մասին, TAPI գազատարի տեխնիկական պարամետրերը, նախագծի իրականացման շրջանակում կնքվելիք պայմանագրերի ու համաձայնագրերի կոմերցիոն կողմերը:
Հաղորդագրությունում նշվում է, որ նավթագազային ոլորտի բազմազանության սկզբունքների վրա հիմնված Թուրքմենստանի էներգետիկ ռազմավարության իրականացումը, որի հիմնական ուղղություններից մեկը՝ բազմաճյուղ խողովակաշարային ենթակառուցվածքի ստեղծումը`ուղղված դեպի համաշխարհային էներգետիկ շուկաներ թուրքմենական էներգակիրների դուրսբերմանը, իրականացվում է մի շարք միջազգային լայնամասշտաբ էներգետիկ նախագծերում, որոնցից մեկն էլ TAPI-ն է:
Նախագծի արդյունավետ իրականացման նպատակով վերջին երկու տարիներին Թուրքմենստանի նախագահի նախաձեռնությամբ և գլխավորությամբ իրականացվում են մեծ աշխատանքներ:
