Ամերիկյան Star ամսագիրն իր առաջին էջին հրատարակել էր Քեմբրիջի դքսուհի Քեթրինի լուսանկարը և այն ուղղորդել էր այն տեղեկատվությամբ, որ արքայազն Ուիլյամի կինը հղի է և երկվորյակների է սպասում: Լուսանկարում երևում է, որ բրիտանական արքայազնի կնոջ փորը կլորացել է, սակայն Celebuzz պորտալը հակադրել է լուսանկարի բնօրինակը և այն տարբերակը, որը Star-ն էր հրատարակել, և նշել է, որ ամսագրի լուսանկարը ձևափոխված է:
Celebuzz-ի անցկացրած քննության արդյունքում պարզվում է, որ լուսանկարը իրոք «նկարված» է:
Բնօրինակի վրա, որտեղ Քեյթը լուսանկարվել է բաժակը ձեռքին, դքսուհու մատնեմատին մատանի է երևում, մինչդեռ Star-ի լուսանկարում այն չկա: Միաժամանակ, ամերիկյան ամսագրի վրա աչքի է ընկնում Քեյթի կլորացած փորը, իսկ բնօրինակում արքայազնի կնոջ զգեստը տձև չէ:
Արքայական ընտանիքն ամերիկյան ամսագրի առաջին էջը չի մեկնաբանել: Ամսագրի այդ համարը լույս կտեսնի ԱՄՆ-ում հոկտեմբերի 1-ին:
Երկու շաբաթ առաջ Star-ը արդեն գրել էր դքսուհու հղիության մասին: Դրա առիթն էր հանդիսացել Քեյթի այն զգեստը, որն ուներ լայնությունը կարգավորող գոտի:
Մինչդեռ մեկ ուրիշ սկանդալ, որը ծագել էր Քեյթ Միդլթոնի կեսամերկ լուսանկարների շուրջ, դեռ շարունակվում է: Վերջերս Closer ամսագիրը հրատարակել էր դքսուհու կիսամերկ լուսանկարները, երբ նա ամուսնու հետ միասին հանգստանում էր Պրովանսում : Ավելի ուշ այդ լուսանկարները հրատարակվեցին Իտալիայում, Իռլանդիայում, և սեպտեմբերի 19-ին պարզ դարձավ, որ դրանք կհրատարակվեն նաև Շվեդիայում և Դանիայում: Արքայական ընտանիքը հայտարարել է, որ պատրաստվում է արգելել դրանց հրապարակումը դատարանի միջոցով:
