Բելառուսի ԱԳՆ-ն հերքել է ԱՄՆ ֆինանսների նախարարության մեղադրանքները՝ կապված Սիրիային ռազմական սարքավորումներ մատակարարելու հետ: ԱԳՆ-ն դա անվանել է «անհիմն և իրականությանը չհամապատասխանող» մեղադրանք, որոնք ԱՄՆ իշխանություններն առաջ են քաշել բելառուսական «Բելվնեշպրոմսերվիս» ձեռնարկության դեմ: Այս մասին ասվում է Բելառուսի ԱԳՆ մամուլի քարտուղար Անդրեյ Սավինի պաշտոնական մեկնաբանության մեջ:
«Դա ոչ այլ ինչ է, քան Բելառուսի վրա ճնշում գործադրելու փորձ՝ մեր երկրի կողմից Սիրիայի ներքին ճգնաժամի կարգավորման նկատմամբ բացահայտ և խաղաղ դիրքորոշման համար»,- ընդգծել է նա՝ ավելացնելով, որ բելառուսական կողմը միշտ կատարում է ՄԱԿ-ի ԱԽ որոշումները:
ԱՄՆ Ֆինանսների նախարարության կայքում տեղադրված մամուլի հաղորդագրության մեջ ասվում է, որ «Բելվնեշպրոմսերվիս»-ի դեմ պատժամիջոցներ են սահմանված Բանակային մատակարարման բյուրոյի հետ իր կապերի պատճառով, որը մտնում է Սիրիայի պաշտպանության նախարարության մեջ և զբաղվում է զենք գնելով: «2011թ. մարտին Բանակային մատակարարման բյուրոն պատրաստվում էր «Բելվնեշպրոմսերվիս»-ից ստանալ ավիառումբերի համար պայթուցիչներ»,- ասվում է հաղորդագրության մեջ (դրանում, սակայն, չի երևում՝ արդյոք գործարքն իրականացվե՞լ է, թե՞ ոչ):
Նախարարության տվյալներով՝ ավիառումբերը վերջին անգամ Սիրիայի զինված ուժերի կողմից օգտագործվել են այս տարվա հուլիսին Հալեպի ռմբակոծության ժամանակ: «Այդ ռմբակոծությունները եղել են ընդդիմության ուժերին վախեցնելուն ուղղված կառավարական զորքերի համակարգված գործողությունների մի մասը»,- ասվում է նախարարության հաղորդագրության մեջ:
