Ռուսական ВЗГЛЯД թերթի փոխանցմամբ՝ բանտարկյալների նկատմամբ բռնությունների դեմ բողոքող Facebook սոցցանցից օգտվող վրացիները սևացրել են իրենց լուսանկարները՝ ի նշան Վրաստանի իշխանությունների քաղաքականության դեմ բողոքի: Թբիլիսիում և Վրաստանի այլ քաղաքներում այսօր էլ շարունակվում են բողոքի ակցիաները:
Ակցիայի մասնակիցներն իրենց հետ կրում են ավելներ, քանի որ բանտարկյալներից մեկին բռնաբարել են ավելով: Ինչպես խոստովանել է Վրաստանի Ազգային անվտանգության խորհրդի քարտուղար Գեորգի Բոկերիան, իշխանությունները ծանր սխալ են գործել քրեակատարողական համակարգում:
Միևնույն ժամանակ, սկանդալային տեսանյութերի հեղինակ, քրեակատարողական համակարգի նախկին աշխատակից, Բրյուսել փախած Վլադիմիր Բեդուկաձեն «սկայպ»-ով վրացի լրագրողներին պատմել է, որ ներքին գործերի ներկայիս նախարար Բաչո Ախալայան և այլք պատվիրել ու կազմակերպել են ազատազրկման մեջ գտնվող պաշտպանության նախարարության գնդապետի նկատմամբ բռնությունները, ով վերջին շրջանում ձեռք էր բերել ընդդիմադիր հայացքներ:
Բեդուկաձեն հավելել էր, որ գնդապետին բռնաբարել էին մահակով, ինչից էլ նա մահացել էր: Այդպիսով Բեդուկաձեն հերքել է պաշտոնական տեղեկատվությունը, թե գնդապետը մահացել է սրտի հիվանդությունից:
