Չինական ինտերնետ-հսկա Alibaba Group Holding-ը ավարտել է Yahoo ընկերությունից 7,6 մլրդ դոլարով իր բաժնետոմսերի 20 տոկոսի գնման գործարքը: Այս մասին հայտնում է The Wall Street Journal-ը՝ հղում անելով Alibaba-ին:
Yahoo-ն Alibaba-ի բաժնետոմսերի 40 տոկոսը ստացել էր 2005 թվականին՝ ինտերնետ-ոլորտում չինական սկսնակ ընկերությունում ներդնելով ոչ մեծ գումար՝ 1 մլրդ դոլար: Իր բաժնետոմսերի հետգնման հարցի շուրջ համաձայնության կողմերը հասել էին 2012-ի մայիսին: Նշենք, որ ներկայում Alibaba-ն գնահատվում է 40 մլրդ դոլար:
Իր բաժնետոմսերի գնմամբ Alibaba-ն կդառնա աշխարհում ամենաթանկ մասնավոր ընկերությունը, բացի այդ` կնվազեցնի Yahoo-ի ազդեցությունն իր բիզնեսի վրա:
Նախկինում երկու ընկերությունները բազմիցս բախվել են Alibaba-ի ընդունած որոշումների պատճառով:
Alibaba Group-ը, որը մասնագիտացած է ինտերնետ-վաճառքի վրա, հիմնադրվել է 1999 թվականին: Ընկերությունը 25 հազար աշխատող ունի:
