Հարավային Կորեայում կասեցվել է մարկիզ դե Սադի «Սոդոմի 120 օրը» վեպի տարածումը: Այս մասին հաղորդում է Agence France-Presse-ը՝ հղում անելով Հրատարակչական էթիկայի պետական հանձնաժողովի ներկայացուցիչ Չան Տհակ Հվանին:
«Գրքի զգալի մասը վերին աստիճանի անպարկեշտ է և դաժան, դրանում հիշատակվում են սադիզմի, անասնապղծության և նեկրոֆիլիայի դեպքեր»,- ասել է հանձնաժողովի ներկայացուցիչը:
Սա «Սոդոմի 120 օրը» վեպի դեմ սահմանված առաջին արգելքն է` սկսած 2008-ից:
Վեպի կորեերեն թարգմանությունը հայտնվելէ տեղի գրախանութներում 2012-ի օգոստոսին: Հանձնաժողովի որոշումից հետո հրատարակիչ Dongsuh Press-ը ստիպված հետ է կանչել ողջ խմբաքանակն ու ոչնչացրել այն: Հրատարակիչը բողոքարկել է հանձնաժողովի վճիռը. եթե այն մերժվի, ապա ընկերությունը կդիմի դատարան:
Dongsuh Press-ի գխավոր խմբագիր Լի Յունի խոսքով՝ գիրքը ոչ թե պոռնոգրաֆիայի և բռնության մասին է, այլ քննադատում է մարդկային էության մութ կողմը, որը թաքնված է նման գործողությունների ետևում:
Դե Սադը «Սոդոմի 120 օրը» վեպը գրել է 1785 թվականին, սակայն ֆրանսիական վեպը հրապարակվել է միայն XX դարում: Այն թարգմանվել է մի քանի լեզուներով: 1975 թվականին իտալացի ռեժիսոր Պիեռ Պաոլո Պազոլինին գրքի հիման վրա ֆիլմ է նկարահանել: Այն վարձույթ դուրս բերելուց անմիջապես հետո արգելվել է մի շարք երկրներում, այդ թվում` Մեծ Բրիտանիայում, Ավստրալիայում, Նոր Զելանդիայում՝ բռնության, կտտանքների և սպանությունների տեսարանների պատճառով:
