Ղազախստանը պատրաստվում է լայնամասշտաբ արտաքին քաղաքական նախագծի գործարկման: Երկրի նախագահ Նուրսուլթան Նազարբաևը հանդես է եկել արտաքին քաղաքական աղմկահարույց նախաձեռնությամբ` հայտարարելով եվրաատլանտյան և եվրասիական անվտանգության հարթակների գործարկման մասին: Այս մասին հաղորդում է Kommersant-ը:
Աստանան հույս ունի իրականացնել այն, ինչ մինչ օրս Մոսկվային չի հաջողվել. ստեղծել փոխհամագործակցության հրապարակ տարածաշրջանային կարևորագույն կազմակերպությունների համար, որոնք զբաղվում են անվտանգության հարցերով: Այդպիսիք են՝ Շանհայի համագործակցության կազմակերպությունը, Կոլեկտիվ անվտանգության մասին պայմանագրի կազմակերպությունը, ՆԱՏՕ-ն, ԵԱՀԿ-ն և Ասիայում փոխգործակցության և վստահության միջոցների խորհրդաժողովը:
Փորձագետները կասկածում են ղազախական մեգանախագծի հեռանկարներին:
Եվրաատլանտյան և եվրասիական անվտանգության հարթակների ստեղծման մասին Նազարբաևն առաջին անգամ հայտարարել էր անցած շաբաթ`Ասիայում փոխգործակցության եւ վստահության միջոցների խորհրդաժողովի անդամների ԱԳՆ ղեկավարների մակարդակով հոբելյանական հանդիպման ժամանակ: Անվանումներից բացի՝ նոր կառույցների մասին Նազարբաևն այլ մանրամասներ չի հաղորդել նախագծի հանձնարարությունների և պոտենցիալ մասնակիցների շրջանակի մասին:
Վերջին տարիներին Ղազախստանի արտաքին քաղաքական խոշորագույն նախագծի ճակատագրի մասին տեղեկություններ է հայտնել նախագահի վարչակազմին մոտ կանգնած աղբյուրը, որի փոխանցմամբ` խոսքը հարթակների ստեղծման մասին է, որոնք կմիավորեն եվրոմիության և եվրասիական տարածքում անվտանգության ապահովման հարցերով զբաղվող կարևորագույն կազմակերպությունները:
Այն հարցին, թե դա ի՞նչ կտա Աստանային, աղբյուրը պատասխանել է. «Ղազախստանի համար կարևոր է ազդելը գործընթացների վրա, որոնք տեղի են ունենում բազմաթիվ հրապարակներում: Ղազախստանը չի հավակնում միջազգային գերտերության դերին: Նախագիծը թույլ կտա բարելավել երկրի միջազգային իմիջը»:
